San Pedro Apostol, Unang Santo Papa

“IKAW Pedro bato, ug ibabaw niining bato, tukoron ko ang akong iglesia, bisan gani ang ganghaan sa kamatayon dili makabuntog niini” – San Mateo 16:18

Ang atong Simbahan magsaulog sa kapistahan ni San Pedro ang unang Santo Papa (Hunyo 29), nga gipili ni Hesukristo nga modumala sa iyang Simbahan dinhi sa kalibutan.

Siya usab ang Prinsipe sa mga Apostoles ug pangulo sa Simbahan ni Kristo ug puli niya dinhi sa kalibutan o Vicar of Christ, diin nahimong unang Santo Papa. Natawo siya sa Betsaida, Galeliya. Human sa pagtawag ug pagpili kaniya ni Jesukristo, gibiyaan niya ang tanan aron sa pagsunod kaniya (Marcos 1:17). Gikan sa ngalan nga Simon si Kristo miilis kaniya sa ngalan nga Cefas sa griego Petros diin ang kahulogan bato (Juan 1:42).

Sa dose ka mga Apostoles, si Pedro lamang ang giingnan ug gitugyanan ug awtoridad ug gahum ni Jesukristo diha sa pagtukod niya sa iyang Simbahan, “Busa sultihan ko ikaw: Ikaw si Pedro, Bato, ug ibabaw niining bato tukoron ko ang akong Iglesia, ug bisan gani ang ganghaan sa kamatayon dili gayud makabuntog niini. Ihatag ko kanimo ang mga yawi sa gingharian sa langit, ang imong itugot dinhi sa yuta, itugot ko usab didto sa langit, ang imong idili dinhi sa yuta, idili ko usab didto sa langit.“ (Mateo 16:18-19)

Diri atong masabot nga si San Pedro lamang ang bugtong Apostoles nga gihatagan ni Kristo ug katungod nga maoy magdumala sa iyang Simbahan dinhi sa Kalibutan, ug gani sa listahan sa mga Apostoles siya maoy nag-una (Mateo 10:1-4), usa siya sa misaksi sa pagka-usab sa dagway ni Jesus o transfiguration (Mateo 17:1-13), pag-ampo ni Jesus sa tanaman sa Getsemane (Mateo 26:36), siya ang unang misangyaw sa ebanghelyo ngadto sa Jerusalem (Buhat 2:14), ug siya ang nangulo sa konsilyo sa Jerusalem uban sa mga tinun-an ni Kristo (Buhat 15:1-21).

Sa pagkabanhaw ni Kristo, sa wala pa siya mosaka sa langit gipahinomdoman siya daan sa iyang obligasyon sa pagdumala sa iyang katawhan. “Human sila makakaon miingon si Jesus kang Simon Pedro, Simon, Anak ni Juan gihigugma mo ba ako labaw sa imong paghigugma sa uban? Siya mitubag, “Oo, Ginoo nasayod ka sa tanan, gihigugma ko ikaw”, si Jesus miingon kaniya, “Atimana ang akong nating karnero.” (Juan 21:15-17)

Si Pedro gilig-on ug giampoan ni Ginoong Jesukristo aron dili siya mabuntog ug malig-on niya ang iyang mga igsoon (Lucas 22:32).

Busa klaro ang pagpadayag diha sa kasulatan nga si San Pedro mao ang Pangulo sa Simbahan uban sa iyang mga sumusunod nga mao ang Santo Papa sa Roma. Kay si San Pedro miadto ug nagwali sa ebanghelyo didto sa Roma, ug siya nagtukod sa Simbahan ni Kristo ngadto sa Roma hangtud nga siya gipatay sa paglansang kaniya nga patuwad ni Emperor Nero panahon sa iyang pagpanglutos sa mga Kristiyanos sa tuig 64 A.D.

Gikan kang San Pedro hangtud karon ang atong Santo Papa nga si Papa Francisco wala gayoy pagka-bugto ang ilang kutay sa pagdumala sa Simbahan ni Ginoong Jesukristo dinhi sa kalibutan, gani mikabat na ug 266 ka mga Santo Papa gikan sa una natong Santo Papa nga si San Pedro. Niining iyang kapistahan ugma, ato gayong pamalandongan ang iyang hiyas sa pagpangalagad isip unang Pangulo nga nakabaton ug pagka-malahotayon sa kanunay gani miabot ang panahon sa pag-ula niya sa iyang kinabuhi para lamang kang Kristo ug sa iyang Simbahan.