Pinakadakung Mall sa Digos, pagaablihan. Pahayag sa katawhan, sublion.

ADUNAY ginatukod nga Mall sa Brgy. Tres de Mayo, nga nahisakop sa parokya sa Mary Mediatrix of All Grace. Ang maong establisyemento maoy pinakadakong mall sa siyudad.

Matud pa sa City Investment and Promotions Officer Edgardo C. Elera, ang maong establisyemento gitagna nga pagaabrehan karung Setyembre 8, o karong pasko.

Ang maong Mall makahatag ug dugang kahamugaway sa mga lumulupyo dinhi sa atong dakbayan, sama na lang sa pagpalit ug mga gamit na sagad pa una sa mga dagkong Mall lang sa Davao makita.

Apan luyo niining maanindot nga proyekto nga anaa sa atong siyudad, mipasibaw sa iyang sentimyento si John Carlo Mibulos.

Sumala niya, maayo man ang maong istruktura kay makahatag kini ug dugang salapi sa panudlanan sa siyudad sama na lang sa buhis, ug makahatag ug dugang trabaho sa mga lumulupyo, apan posible nga aduna kini dili maayong epekto sa mga manimbahay ilabi na sa adlaw’ng Domingo tungod sa mga kalingawan. Isa nga maapektuhan niini mao ang mga kabatan-onan sa atong siyudad, ug sa mga kasilinganang dapit.

Si Ate Warlinda Albert, 47, minyo, adunay 4 ka anak nga nagpuyo sa Guihing, Hagonoy Davao del Sur nagkanayon, maayo man ang maong Mall kay makahatag ug dugang kalaagan o kasuroyan sa mga tao nga sakop sa siyudad ug sa mga silingan nga mga lugar. Apan isip usa ka inahan nahadlok siya nga ang iyang mga anak, basin sige na lang daw kuno ug laag, ug dili na musulod sa klase sa panahon sa ting-klase ug makalimot na kining mosimba. Kini malikayan sumala pa kaniya kung adunay maayong kumunikasyon ug pagsinabtanay sa pamilya, sama na lang sa pagsimba ug buntag kung adunay plano nga manlaag. (Sem. Ariel Maglupay | Digos)