Pentecost Celebration (Mati Newsbits)

Pentecost Celebration

GISAULOG ang solemnidad sa Pentecostes pinaagi sa tibuok adlaw nga pagsadya sa awit, pag-ampo, sayaw, pagsalo-salo, ug kasaulogan sa Eukaristiya nga gidalit sa mga sakop sa Catholic Charismatic Renewal Movement (CCRM) sa parokya ni San Nicolas de Tolentino Cathedral niadtong Mayo 24, 2015.

Nagsugod ang kapin gatos ka mga miyembro gikan sa mga Kristohanong katilingban ug managlahing mga sona ubos sa parokya sa pagpalanog sa ilahang mga malipayong kasikas sa St. Therese Gym sa Clergy House Compound sa Madang, Siyudad sa Mati, alas 7:00 sa buntag hangtud alas 4:30 sa hapon. Gikulminar ang kasaulogan sa Adlaw’ng Natawhan sa Simbahang Katoliko pinaagi sa paghalad sa Eukaristikanhong Sakripisyo nga gipangunahan ni Apostolic Administrator Fr. Edito S. Baño, kinsa usab nagpasabot sa misteryo sa ikatulo nga Persona sa Santisima Trinidad.

Sayo niini, si Fr. Pedrito P. Mapayo, diocesan chancellor ug Clergy House in-charge ang namulong sa katawhan kabahin sa tahas ug mga gasa sa Espiritu Santo alang sa matag binunyagang Kristiyano.

Sa pakighinabi sa internal vice-president Sis. Nerissa Siarot, siya miingon, “Matandugon kaayo ang gipadayag nga mga personal nga pag-ampo ug faith-testimony dungan sa mga awit nga nakapukaw gayud sa kasingkasing diha sa paghigugma sa Dios.”

Samtang ang bag-ong diocesan coordinator Sr. Edith Tayko, LGC, ang nakighalubilo sa mga lideres human sa Pentecost Celebration aron mahisgutan ang mga ideya ug sugyot alang sa kalambuan sa CCRM gikan sa pagkahimugso dekada 90 ubos sa aktibong liderato ni Most Rev. Patricio H. Alo, D.D.

Panaw-duaw sa Imahe sa Sto. Niño de Cebu

SA dakong kahinam gipaabot ang pagduaw sa pilgrim image sa itom nga Sto. Niño gikan sa Cebu karong Hunyo 2-7 atol sa pagtimaan sa ika-450 nga tuig sa pagkakaplag sa Balaang Bata sa Sugbo.

Ang Kaplag Celebration himoon pinaagi sa pagduaw sa Sto. Niño sa upat ka mga bikaryato sa diyosesis sa Mati. Gikan sa Tagum, unang duawon sa Balaang Bata ang Bikaryato sa Cateel, Hunyo 2-3; sunod ang Caraga, Hunyo 3-4; ang Mati Cathedral Hunyo 4-5; ang simbahan sa Divine Mercy Hunyo 5-6; ug katapusan ang Lupon, Hunyo 6-7.

Sa matag panaw-duaw, himoon ang mga rito sa: Welcome & Catechism, Veneration, Kasaulogan sa Santos nga Misa, Prayer Vigil hangtud sa gabii; ug sa sunod adlaw ang farewell Mass ug pagpanaw sa sunod nga simbahan. Gikan sa Mati pagadad-on usab si Sr. Sto. Niño ngadto sa Artsidiyosesis sa Davao.

Sa laing bahin ang Kaplag Krus ni Magellan maoy mohimo sa susamang panaw-duaw sa Mati diocese sa Sept. 22. Ang kalihokan pagagiyahan usab sa komunidad sa mga Paring Agustino sa Orden ni San Agustin (OSA) sa Mati.

Mga bag-ong priests’ assignments

Sa pagsaulog sa kapistahan ni Sr. San Isidro Labrador sa lungsod sa Banaybanay, gi-anunsyo ang pipila ka mga kausaban sa priests/parochial vicars’ assignments sa Mati diocese nga epektibo sa unang adlaw sa Hunyo: Gikan sa Divine Mercy Shrine and Parish si Fr. Orveil Andrade ang mabalhin na sa Cateel apan magpabilin gihapon nga DYA director; si Fr. Barry Gil R. Pilar ang mapulihan sa pagka-principal sa Maryknoll School of Lambajon ni Fr. Rey M. Armasa, samtang si Fr. Barry ang mahimong parochial vicar sa Sigaboy, sa lugar ni Fr. Roland F. Sayman, kinsa mabalhin sa Baganga kapuli ni Fr. Rey. Ug si Fr. Elezer D. Pagkilatan, gikan sa Caraga ang mabalhin na sa Catedral. Sa Caraga usab, si Fr. Uldarico A. Toroba, Jr., kura paroko, ang magpabilin nga direktor sa Church Cultural Heritage ug motambong sa National Convention sa Sorsogon karong Hunyo 1-4, 2015. Si Fr. Ronie Orellanida ang bag-ong parochial vicar sa Caraga. Si Fr. Philip Dimalanta ang bag-ong vocation director og CCRM director.