Parokya sa Maa nagsaulog sa ika-20 nga anibersaryo

Mobile Civil Registry Booth

MAHINANGPON nga gisaulog sa mga parokyano sa St. Francis of Assisi (Maa) ang ika-20 ka tuig nga anibersaryo sa pagkatukod niini, Mayo 31, 2015. Tungod kay ang maong Foundation Day natumong man nga Holy Trinity Sunday, doble gayud ang kalipay sa mga katawhan sa parokya.

Ang kasaulogan gisugdan sa Santos nga Misa nga gipangulohan sa Kura Paroko Fr. Emmanuel Gonzaga ug Parish Vicar Fr. Loreto Bastasa.

Sa iyang homiliya, gibalik-tanaw ni Fr. Bong ang pagsugod sa parokya sa gamay ug yano nga simbahan apan pinaagi sa mga paningkamot sa katawhan ug sa mga miaging mga kura paroko, ningdaku na kini sa paglabay sa mga tuig. Nagpasalamat siya sa tanang katawhan sa ilang walay hunong nga suporta sa pagpalambo sa parokya bisan pa taliwala sa daghang pagsulay ug kalisud.

Gipasalamatan usab niya ang mga nag-alagad sa parokya sa ilang maabtikon nga paghatud sa Maayong Balita ngadto sa mga parokyano sa 40 ka mga GKKs.

Hinumduman nga ang Maa kaniadto kahadlokan nga lugar apan karon nahimo kining malinawon ug malamboon. Gihangyo sa kura paroko ang mga parokyano nga unta ipadayon nila ang pagtabang sa umaabot pa nga mga proyekto, ilabi na ang pagpapintura ug pagbutang ug bricks sa ‘façade’ sa simbahan aron makumpleto na gayud kini sa dili pa moabot ang kapistahan ni St. Francis of Assisi karong Oktubre.

Isip pasalamat ug pahalipay sa mga parokyano sa St. Francis of Assisi mipartisipar ang Barangay Maa pinaagi sa Mobile Civil Registry Booth niadtong Mayo 31, 2015. Uban pang nagkalain laing serbisyo nga giandam ang parokya sa pakig-alayon sa TESDA mao ang libreng medical ug optical check-up, dental check-up ug ibot sa ngipon; mga baligya nga religious articles sa Catechist Booth ug ukay-ukay sa DMI Booth; libreng manicure, pedicure, ug gupit sa buhok.

Ang Maa Parish Multi-purpose Cooperative nagbutang usab ug booth sa ilang opisina aron moabi-abi sa gustong magpamyembro ug mohatag ug ‘financial advice’ sa nagplano mag-loan sa coop. Ang tanan nga gigutom gihatagan ug libreng lugaw busa miuli ang mga tawo nga busog ug natagbaw gayud. (Marian Carmela Raquel)