Pag organisa sa PSAM-Caritas, karon na!

Ang pag organisa sa PSAM-Caritas sa mga parokya ug mga Mission Stations sa atong diyosesis maoy usa sa mga gisugyot nakong konkretong lihok karong Tuig sa mga Kabus. Kining PSAM-Caritas mao ang Parish Social Action Ministry ug Caritas.

Kini ang gipalapad nga ministriya sa gugma ug kalooy sa Parokya. Gikan sa tulo lamang ka programa kaniadto, sa chapel needs, livelihood, ug emergency, giabli kini sa lain pang posibleng mga lihok sa mga GKK aron sa pagtubag sa lain pang mga panginahanglan sa katawhan labot sa kinaiyahan, yuta, panglawas, edukasyon, maayong panggamhanan, kalinaw, likay kalamidad, masakiton, binilanggo, ubp.

Nanginahanglan kini ug mga maalamon, makugihon, mabination ug maalagarong mga tigdumala nga nagtinabangay ug naghiusa sa pagpahigayon sa maong ministriya. Aron mapasayon ang ilang pagtinabangay ug paglihok, gikan sa poblasyon sa parokya ang mga piliong tigdumala, gawas sa mga PSA zone coordinators. Ang mga tigdumala uban sa ilang kura paroko, human pakisusi ug pagkonsulta sa uban, magpili sa mga programa nga angayan nilang pasiugdahan ug padaganon.

Nanginahanglan kining gipalapad nga ministriya og daghang mga lumilihok, dili lamang ang mga PSA. Ang mga PSA sa GKK kinahanglan dungagan, ug maoy unang kasaligan nga molihok. Mga boluntaryo nga magtutudlo ug mga studyante gikan sa mga tulunghaan dako kaayo nga matabang. Ang mga miyembro sa organisasyon sa Parokya mahimo usab nga sukaranan sa mga lumilihok. Sa katapusan, mahimo usab laing mga boluntaryo gikan sa laing sektor sa katilingban.

Natural usab, manginahanglan kini’g pondo. Busa, katungdanan sa kura paroko ug sa finance council sa parokya nga pundohan ang maong ministriya matag tuig apil sa tinuig nga budget. Mahimo usab nga 30% sa bahin sa “tithing” sa GKK ug sa parokya idugang sa pundo. Manginahanglan usab, nga matag karon ug unya magpahigayon og espesyal nga fund-raising alang sa partikular nga proyekto.

Ug makatabang usab nga makig-partner sa laing sektor, labi na ang panggamhanan, aron makatabang sa pagpaabot sa katawhan sa mga hinanaling tabang.

Dili nato kaya nga tubagon ang tanang panginahanglan sa mga tawo alang sa ilang kalingkawasan ug kalamboan sa maayong pamuyo ug pagkinabuhi. Kinahanglan makigtambayayong kita sa laing mga sektor. Busa ang PSAM-Caritas kinahanglan magpahigayon ug maayong pakiglambigit sa laing sektor sa katilingban nga susama ang mga katuyuan sa PSAM-Caritas. Ang mga ahensiya sa panggamhanan ug ang mga pribadong sektor adunay dako kaayo nga kamaohan, katigayunan, ug mga eksperto sa lain laing panginahanglan.

Dili usab kalimtan ang panginahanglan sa pagtinabangay diha mismo sa parokya sa, sa bikariato, sa diyosesis ug tibuok Simbahan. Maghiusa kitang moatiman ug moduyog kasakit ngadto sa atong mga kaigsoonan. Kinahanglan nato nga magkahibal-anay ug mag-inambitay. Sa atong paglihok, mga pamaagi, ug mga katuyuan, mapakita nato ang tinuod nga diwa sa kahiusahan ug paghinigumaay.

Sa sunod tuig 2016, atong idugang sa atong pagpangandam ug pagbag-o ang Tuig sa Yukaritiya ug sa Pamilya. Unya, si Papa Francisco nagpahibalo usab nga saulogon ang espesyal nga Hubileyo sa Kalooy, alang sa tibuok Simbahan sunod tuig usab. Alang kanako dayag kaayo nga ang kalangitan nagapadayag kanatong tanan sa kabubut-on sa Amahan. Atong panahon karon sa bag-ong pagpadayag ug pagpakita sa Simbahan ngadto sa kalibutan, sa tinuod nga hulagway ug kasamahan sa Dios, sa iyang Gugma ug Kalooy.