‘Mary, Woman of the Eucharist’

HUMAN na ang Mayo apan magpabilin ang atong pagmahal sa Inahan ni Hesus nga nagauban kanato sa matag pagsaulog sa Santos nga Eyukaristiya.

Liboan ang mitambong didto sa Ateneo De Davao University High School Campus, Matina sa gisaulog nga engrandeng prusisyon isip pagpasalamat sa atong Mahal nga Inahan uban ang temang, “Mary Woman of the Eucharist.”

Ang Bible Enthronement nag abli sa selebrasyon. Misunod dayon ang Praise and Worship nga gipangunahan ni Bro. Raffy De Leon (The Loved Flock Catholic Charismatic Community). Matud pa niya, maayo nga ang katawhan magdayeg kay tungod niini mas masinati nato ang presensya sa Ginoo, bisan daghan og problema sa kinabuhi, kita mas mapaduol sa Ginoo.

Si Dr. Mike Manalaysay, pangulo sa Archdiocesan Council of the Lay Apostolate and Integrated Movements (ACLAIM) nagpahayag sa iyang pag-abi abi sa tanan nga angay tagaan ug pagtagad si Birhen Maria. Si Msgr. Paul A. Cuison, ACLAIM Spiritual Director nagpaabot sa iyang mensahe kalabot sa Archdiocesan Nourishment Center (ANC). “Tumong sa Center mao ang pagtabang sa mga batang kabus. Natukod kini nga programa subay sa mensahe ni Pope Francis sa pagdala sa Simbahan diha sa mga kabus.”

Ang guest speaker nga si Sis. Angel C. Libron, naghatag ug mensahe bahin sa Sorrows of Mary. “Kailangan natin mag nilaynilay at bumalik kay Maria.”

Halos 52 ka mga managlahing dagway ni Birhen Maria ang miapil sa prusisyon gikan sa nagkalain-laing parokya ug katilingban.

Matud pa ni Demita Pepito nga taga Loved Flock, dako iyang kalipay kay tungod niini mas mapaduol siya kay Hesus nga kanunay nagatubag sa iyang pag-ampo.

Mabungahon ang nahimong aktibidad nga gitapos ug Misa sa San Pedro Cathedral. (Jofaye Falgui) (Photos: Brenda Milan | Werty Desquitado)