‘Madre o dili, adunay misyon’

SA iyang 35 ka tuig isip usa ka madre, si Sr. Mary Angela Dejucos, OSB nadestino na sa nagkalain-laing lugar sa Pilipinas ug nahatagan ug higayon nga makapuyo sa Holy Land kapin usa ka tuig. Siya karon anaa na sa iyang ika-15 nga missionary station sukad sa pagsulod niya sa kongregasyon niadtong 1980.

Sa iyang pagkabata, nakita nga inspirasyon ni Sr. Angela ang iyahang pamilya nga labing mainampoon sa Balaang Rosaryo. “Naga-apil mi sa Barangay Sang Birhen tapos GKK-based. So fruit ko sa new church sa Davao way back 1960s.”

Matud pa niya, aktibo iyang pamilya sa Gagmay’ng Kristohanong Katilingban (GKK), og didto niya nakita ang bokasyon.

Isip usa ka boluntaryong katekista sa Flores de Mayo, nabati ni Sr. Angela ang tawag ni Kristo. Mas napamatud-an niya kini kadtong nakakita siya og Benedictine Sisters nga nagbisita sa ilahang GKK.

“Didto na-enhance ang calling then, nakatubag kay naa ma’y Benedictine sa Ulas. Ang Ulas man ang una nga gina-seminaran sa mga katekista. So nagavolunteer, naga tabang tabang then little by little, nakadecide na.”

Ang Ginoo lang ang iyang inspirasyon sa pagpadayon ug pag-alagad. Alang kaniya, inspiration sab nga ang simbahan buhi, ug anaa ang Espiritu sa Ginoo.

“Because looking at these people (serving the Church), it means naa jud ang Espiritu sa Ginoo nganong nagapadayon ang kalihokan sa simbahan through this kind of ministry and the Church.”

Alang kang Sr. Angela, magmatinud-anon kita sa atong kaugalingon ug paminawon ang tawag ni Kristo.

“If they are called, the grace of God will be there to give them the courage and say yes for that calling. Don’t be afraid. The Lord will really give the grace.”

Sa pagpangutana kung unsa kaha siya karon kung wala pa siya nagmadre, sya mitubag, “Happy Christian ko ug manerbisyo gihapon sa simbahan kay ma madre ka o dili, naa jud ka’y misyon sa Simbahan.”

Alang kaniya siya bulahan tungod sa pagdawat sa tawag sa Ginoo, og gihatagan ug grasya aron sa paglahutay.

SI SR. DEJUCOS DUGAY SAB NGA NAGSERBISYO SA DIOCESE SA DIGOS BAG-O PA MAN KINI MIBALHIN SA ARCHDIOCESAN LITURGICAL CENTER SA ARCHDIOCESE SA DAVAO. SA IYA NAMO NAKUHA ANG IMPORMASYON NGA ANG “MONK” TERMINO SA MGA LALAKING BENEDICTINE. KUNG BABAE, BENEDICTINE NUNS. SALAMAT SR. MARY ANGELA OG SA OBLATES OF ST. BENEDICT COMMUNITY (OSB)-DIGOS. (Janin Langoy)