Kasinatian sa GKK, gipasalamatan sa DADITAMA

Banko sa GKK. Piso para sa Seminaryo. Mortuary. Alluyon.

Kini pipila lamang sa mga nahisgutang Best Practices kon maayong kasinatian diha sa mga Gagmay’ng Kristohanong Katilingban (GKKs) sa paghisgut-hisgut sa mga representante sa quarterly Davao, Digos, Tagum ug Mati (DADITAMA) meeting sa Benedictine retreat house sa Digos, niadtong Hunyo 17-18.

Gipangunahan sa Arsobispo sa Davao Romulo Valles ug mga Obispo sa Digos Guillermo Afable ug Wilfredo Manlapaz, nahibaw-an nga pipila sa mga kapilya sa Diyosesis sa Tagum ug Digos adunay Banko sa GKK, samtang ang Diyosesis sa Digos, Piso Para sa Seminaryo. Pipila usab sa mga kapilya sa Artsidiyosesis sa Davao ug Diyosesis sa Mati, adunay Dayong (Mortuary) kon pagtapok ug donasyon panahon sa kamatayon isip tabang pinansyal sa miyembro niini. Livelihood program usab aron pagtabang sa mga Lumad ang gipasigarbo sa Diyoses sa Mati.

Nahisgutan kining mga kasinatian isip kabahin sa pagahimuong Mindanao report nga ipasang at sa kaulohan sa muabutay nga National Basic Ecclesial Communities (BEC) Congress karong Nobyembre 11-14, 2015.

Uban pa sa mga mahiapil sa report nga givalidate sa tigum mao ang mga musunod:

Lihuk-pagdayeg (worshipping): Kasaulogan sa Pulong, Easter Triduum, KSP de gallo, Way of the Cross
Lihuk-pagtudlo (teaching): Pagdaghan sa volunteer catechists, study day sa mga kaabag, pagtabang sa mga naga-exposure nga mga estudyante sa GKK
Lihuk-pagtabang (serving): Typhoon Pablo bayanihan, pag organisa ug mga GKK emergency response teams

Nanghinaut si Bp. Manlapaz nga makakat-on ang matag usa sa mga nindot nga kasinatian sa uban. “Hatagan nato ug pagpalawom ang atong pagkakabahin sa katilingban — ang kalan-on namo, pasayloa kami…BEC-building and strengthening of participation of communities is important”, dugang pa sa GKK Bishop. Gikan sa Diyosesis diin nagsugod ang GKK, mituo ang Obispo sa Tagum nga kining atong mga katilingban mao ang kalig-on sa simbahan. Kahinumduman nga iyang gisundan ang mga GKK founders sa Tagum — Bishop Joseph Regan, Maryknoll Fathers ug Brothers, Bishop Pedro Dean ug Bishop Ramon Villena. Mapasalamaton ang tanang nanambong gikan sa nagkalain-laing ministriya sa DADITAMA tungod sa mga kalambuan sa kristohanong katilingban.