Kaputian nagpahigayon og Music Workshop

“IMPORTANTE gayod kaayo ang musika ilabina diha sa kasaulugan sa Santos nga Misa tungod makatabang kini sa pagpabuhi ug pagpadayag sa atong pagdayeg og pagsimba sa Ginoo ug pagpadayag sa atong pagtoo diha sa usag-usa,” saysay sa malipayong kura paroko sa Sr. Sto Niño parish, Kaputian nga mipahigayon ug Musical Liturgical Workshop niining bulana.

Dinuyugan sa mga manugtogay ug mangantahay sa parokya sulod sa pila na ka tuig, Longcor Malacua, 56 anyos ug katekista nga si RosarioSaldaña, 70 anyos, tumong sa maong workshop nga dungagan ang kaalam sa mga mang-aawit ug manduyogay sa matag Gagmay’ng Kristohanong Katilingban (GKK). Sila gitun-an usab bahin sa pag-andam sa mga hustong alawiton sibo sa panahon ug okasyon sa simbahan nilabina kay adunay nagkadaiyang matang sa kanta.

Kini aron mamahimo gayod nga liturgical o solemne ang usa ka kasaolugan o misa. Mikabat sa 174 ka mga partisipante gikan mga GKKs ang misalmot sa workshop nga nagahandum gayod nga madugangan pa ang ilang kaalam bahin sa musika alang sa Ginoo.