Hilum aron ikaw makalabang

Ika-12 nga Domingo sa Ordinaryong Panahon
Jb. 38:1, 8-11/ Ps. 107/ 2 Cor. 5:14-17/ Mk. 4:35-41

Kinsa kaha nato ang dili mahadlok nga mobalik si Yolanda o si Pablo. Sila nagdala sa mga dagkong tubig ug hangin nga makamatay. Walay usa kanato mangandoy nga mahitaboan pa kita sama niining mga dagkung katalagman sa atong kinabuhi.

Sa ebanghelyo, si Kristo midapit sa iyang mga tinun-an nga motabok sa lanaw. Apan ilang nasinati ang unos nga makalilisang. Kining maong unos gipahunong na sa Dios bisan sa unang pagbasa nga atong nadungog. Ang Dios mao ang gamhanan sa tanang binuhat. Mao nga sa ikaduhang pagbasa kita gipahimangnuan nga si Kristo maoy magtukmod nato sa atong mga buhat. Ang iyang gahum maoy maghatag kanato’g kalig-on sa kanunay, kalig-on nga magwatang sa tanang kahadlok.

Nagkadaiyang unos usab atong nasinat sa atong kinabuhi. Dili Yolanda o Pablo apan unos pinansiyal, pisikal, moral o espiritwal. Usahay maghuna-huna kita basig dili na kita makalabang sa utang aron makapaeskwela sa atong mga anak. Usahay mahadlok kita basin dili na makalabang sa sakit nga atong giantus. Usahay magduha-duha kita basin dili na makalabang sa sala diin kita naglunang. Ug usahay murag natulog man lamang ang Dios sa atong lisud nga kahimtang.

Apan dili nato kalimtan nga si Kristo nagmata ug uban siya sa atong panaw. Kinahanglan lamang kita nga mogahin og kahilum aron ang iyang gahum ug kusog nga gipaambit kanato atong magamit ug mapatunhay. Kung kita maantigong moampo, mamalandong sa iyang pulong, mosimba, makalatas kita sa unos sa kinabuhi. Kung atong gahinan og panahon ang kahilum ug modistansiya kita sa mga saba nga palibot, kita makahuna-huna sa maayong mahimo ug malig-on.

Walay unos o katalagman nga atong masinati nga dili kita makalabang kung ang pag-obserbar sa presensiya sa Dios atong mapuy-an. Busa gahin og kahilum aron ikaw makalabang taliwala sa mga unos sa kinabuhi.