Daughters of St. Paul, 100 ka tuig na

Image source: daughtersofstpaul.com

Mapasalamatong paglantaw sa nangagi

TATAW kaayo ang lamdag nga nasinati sa mga unang mga komunidad sa mga madre sa Daughters of St. Paul (Paulines). Kini mao ang nagdasig kanila sa paghalad sa ilang kinabuhi alang sa apostolado. Kini nagagikan sa pundasyon diin si Padre James Alberione (kanhi) human sa tuig 1915, inabagan sa mga unang mga batan-ong sumusunod, nag-abli ug upat ka mga komunidad ug nagpabuhat sa dakung Simbahan ni San Pablo sa Italia. Siya nagsugod usab sa pag-abli og 2,200 ka mga libreria alang sa katawhan; nag-imprinta og 500 ka mantalaan sa mga parokya; nag-abli ug mga sentro sa pamantalaan; ug naghatag og mga “Adlaw” sa Bibliya sa gatusan ka mga parokya.

Pagpa-kabalaan ug misyon sa apostolado sa pamantalaan alang sa pagsabwag sa Maayong Balita ang duha ka nagpaluyong inspirasyon nila sa pagsunod sa tawag sa Dios.

Unsaon kini pagsinati?

Kinahanglan nga mamahimo silang manggihatagon, maningkamot sa pagpahilayo sa sala, paglambo, pagkinabuhi diha kang Kristo, ug pagmantala sa Maayong Balita.

Hugot ang ilang pagtoo nga “ang tanang ilang mabuhat mopilo-pilo ngadto sa ikanapulo. Ngano? “Tungod kay ang Ginoo nagtawag sa tanan ngadto sa pagkabalaan.”

Naka-ankla diha sa pag-ampo ang tibuok dagan sa tanang apostolikanhong buhat: Pag-ampo nga ang kakusog milabaw sa kakusog sa tingog sa mga makina sa apostoladong tekniko; Pag-ampo nga anaa nakataod sa mga elemento nga gihuptan sa karisma sa mga Paulines.

******

ANG mga batan-ong sumusunod dili lamang hingpit nga misalig sa Fundador kundili uban usab si San Pablo. Matud pa sa kasinatian ni Madre Thecla ang usa sa mga unang mga madre sa Paulines, “Didto sa Susa, (Italy) si San Pablo ang among pangulo sa komunidad. Among gibitay ang iyang kuwadro sa among sentro sa pagpakaylap sa Maayong Balita. Sa kanunay kami ug ang ubang mga eskwela, o bisita mohalad kaniya sa mga bulak ug pag-ampo. Kining mga buhat sa paghalad nakapalipay kanamo tungod kay buot usab namong si San Pablo ang mouna ug mogiya kanamo sa tanang buhat sa pagsangyaw sa maayong Balita.”

Panahon pagsugod sa Paulines:

Labing dakung kalipay ang naglarawan sa unang mga madre, sa diha nga sa katapusan sa ilang retiro (pamalandong ug pag-ampo sa walo ka adlaw) nga gigiyahan ni Canon Francisco Chiesa, usa na ka Beato karon ug ang Obispo Ugo Mioni, ilang gihalad ang ilang tibuok kinabuhi ngadto sa Dios pinaagi sa pang-publikong paghalad sa kaugalingon o mga voto. Matud pa sa Pauline Cooperators Bulletin:

“Hulyo 22, 1922 — Human sa pito ka tuig nga pagsulay; sa nagpahipi nga apostolikanhong buhat, mapaubsanong sakripisyo ug walay hunong nga pag-ampo, uban sa ang nakatagong kinabuhi sa konsagrado, kining mga batan-ong mga babaye mohalad na sa kaugalingon ngadto sa Dios, hangtud sa hangtud diha sa misyon sa Maayong Pamantalaan, atubangan sa katawhan (public vows), ug sila ang mamahimong sakop sa Pious Society of the Daughters of St. Paul. Sila ang unang siyam ka mga bag-ong sakop: gikan dinhi, hangtud karon, ang ilang pagdaghan nagsugod.”

Si Beato James Alberione, niadtong tuig 1910, sa dihang tataw na ang ‘dakung kahayag,’ mihimo sa usa ka seguradong lakang ngadto sa pagtubag sa plano sa Dios. Iya nang gipamalandongan nga ang kinabuhing konsagrado mao ang (ilhanan) identity sa mga Daughters of St. Paul ug sa Pamilya Paulina.

“Mga manunulat, teknikal personnel, mga promotor…apan mga konsagradong mga babaye…maghalad sa tibuok kinabuhi og tibuok kamatuoran ang isangyaw nga doktrina. (cf AD 23-24)

******

Ang pagka-martir alang sa gugma!

Ang grasya sa pagsugod sa kongregasyon nag-awhag kanamo sa kinasingkasing pagbasa pag-usab sa mga panig-ingnang kasinatian sa among mga madre kinsa mihalad sa ilang kinabuhi alang sa Ebanghelyo. Ang nagtukod sa among kongregasyon miingon:

“Ang mga madre sa Daughters of St. Paul naghupot sa labing mahinungdanong bili sa pagka-martir…ug mao kana ang gitawag nga ‘pagkamartir alang sa gugma.’ Ubay-ubay na ang mga madreng mihalin ning kalibutan human ihalad ang tibuok kusog, lawas og kalag alang sa apostolado.”

Kon atong isulat ang ilang mga kasaysayan, dayag ang ilang pagkabayani. Ang paghisgot sa ilang matag kasaysayan kinabuhi maoy naghatag sa mapadayonong kinabuhi sa tibuok kongregasyon aron kini mahimong mabungahon.

Tungod kanila nahimo ang dakung progreso sa kongregasyon nga sa karon miabot na sa 50 ka nasud ang ilang presensya sa tibuok kalibutan. Ang nagsaysay niining atong gimantala nga si Sr. Maria Parenzan ang bag-ong Dakung Pangulo sa Kongregasyon, miingon nga “kon atong isulat ang kabalaan sa mga unang sumusunod kang Beato James Alberione, makita nato ang ilang pagkabayani, tungod kay natawo sila diha sa kawad-on…walay ilhanan o ngalan, walay balay, walay nakahibalo kon kinsa sila…mga tuig nga pagtoo lamang og gugma ngadto sa Dios ang nagpabuhi kanila. Sila ang mga madre, kinsa nagmisyon nga tag-duha o tulo, uban sa hinagiban sa pagtoo ug andam magkinabuhi sa kawad-on, naglakaw sa dalan nga daw walay kapaingnan, apan nakaabot sa mga dagkung mga siyudad nga gimando sa Fundador…nagtukod og mga tabernakolo sa daghang mga parokya sugod sa Italia, ngadto sa Brazil, Argentina, Estados Unidos, Francia, Poland og sa China. Kining mga unang mga missionario ni Beato Alberione nagsugud sa “Sitwasyong sama sa Bethlehem” diin tataw ang kawad-on sa kagamitan, kalisod sa pinulungan og apil na ang bugnaw nga pagtagad sa ubang nasud.

Kon pamation nato ang Santo Papa Francis miingon siya: “Aduna ba kita’y maluag nga panlantaw og dakung kaisog? Nagdamgo ba kita sa mga maayong butang alang sa katawhan?

Si Beato Alberione usab miingion:

“Ang mga madre sa Daughters of St. Paul kinahanglan adunay dakung pagsalig kang San Pablo. Siya ang mopadala kaninyo sa grasya sa pagbag-o gikan sa kinabuhing bugnaw ngadto sa pagka-maikagon. Ang mga tawong bugnaw dili mahimo sa atong kongregasyon, kinahanglan mainiton, aktibo, manggihatagon, ug maikagong tawo ang atong pangitaon. Sulong kanunay!”

Naabot na ninyo ang tanang nasud sa kalibutan:

“Sa inyong paglakaw gikan sa usa ka nasud ngadto sa uban
O paglupad tabuk sa mga bukid pinaagi sa aeroplano, o tabuk sa mga dagat
Ayaw pagsaysay mahitungod sa inyo nang nabuhat
Mga tigpas-an kang Kristo
Buhi og aktibo nga sakop sa Simbahan
Abante! Dalha sa tanan ang Gugma sa kamatuoran!”

Hinaut nga si Apostolo Pablo, sa mga Pagano, ang banggiitang misyonero sa Ebanghelyo, motabang kanato sa pagpadayon sa unahan, agi sa mga dalan nga giagian sa katawhan karon. Hinaut usab nga si Maria, Reyna sa mga Apostoles, mamahimo natong inahan og giya. Amen.

******

Daghang salamat sa tuig 1915, Hunyo 15, natawo ang kongregasyon sa mga Madre sa Daughters of St. Paul (Paulines) didto sa Alba, Italia. Damgo kini sa dihang seminarista pa si kanhi Beato James Alberione. Ang damgo nahimugso, sa diha nga siya usa na ka pari sa Seminaryo sa Alba, pinaagi sa panabang sa usa ka Canonista nga si Msgr Canonico Chiesa ang Rektor sa Seminaryo.

Dinhi sa Pilipinas ang mga kumbento sa mga madre nahimutang sa 15 ka mga siyudad diin ang apostolado sa pagsabwag sa Maayong Balita pinaagi sa mga basahon, mantalaan, programa sa radio, video o musika og mga awit ug sa ubang komunidad, mga programa sa telebisyon, sama pananglit dinhi sa Davao “Banquet of Love” TV Mass alang sa mga masakiton ug kadtong dili makadalikyat sa simbahan.

Sa among pagsaulog sa ika-50 ka annibersaryo sa pagsugod sa kongregasyon si Kanhi Cardinal Jaime Sin miingon sa iyang homiliya: “Anaa sa atong selebrasyon karon ang punto sa pagkamangihatagon ug pagsaksi nga makita nato sa matag madre sa Daughters of St. Paul (Paulines). Maaninaw nato ang ika-50 ka tuig nga milabay dili isip mga dagan sa tuig, apan isip mga mapadayonong buhat sa pagka-manggihatagon ug pagsaksi sa labing dakung pagpadayag sa espiritu sa mga madre sa Daughters of St. Paul. Niining miaging 50 ka tuig gipakita nila ang mainitong kakugi sa pagbuhat sa mga buluhaton sa Simbahan, ilabi na sa natad sa media sa komunikasyon.

Kini usa ka apostolado nga anaa sa labing una sa mga kalihukan sa Simbahan, ilabi na karong panahona diin ang katawhan daw nahitumpawak na sa paghunahuna nga daw mas kinahanglanon kini sa ilang kinabuhi, kay sa ilang paghatag ug bili sa panginahanglanon sa kalag o sa ilang relasyon sa Dios. Mga Madre sa Daughters of St. Paul kon Paulines, kamo mga “anghel sa Maayong Balita” alang sa kamatuoran, alang sa kalinaw, alang sa relihiyon, alang sa sosyal nga hustisya, alang sa Kristyanong demokrasya og sibilisasyon.“ (Jaime Cardinal Sin, Archbishop of Manila, kanhi)

Si Obispo Ruperto Cruz Santos, D.D. ang Obispo sa Balanga, Bataan, miingon: “Kamo ang “Gasa” sa Dios dinha sa Kinatibuk-ang Simbahan. Bililhon nga gasa pinaagi sa inyong mainitong kadasig og debosyonsa apostolado sa media sa Social nga Komunikasyon. Ang inyong selebrasyon sa ika-100 ka tuig sa kalibutan, selebrasyon sa Himaya sa Dios…”

Daku ang among pasalamat sa pagdawat sa presensya og apostolado ni Obispo Clovis Thibault (kanhi) sa mga madre dinhi sa Diocese sa Davao, niadtong 1953, diin kami nagsugod pagtukod sa among kumbento ning siyudad.

Sr. Eugene

Nagpasalamat usab kami sa pagdawat sa among mga madre nga motabang sa pagsugod sa Mantalaan sa Diyosis, “Taboan” hangtud nahimong “Catholic Herald”. Mitabang usab sa pagsugod sa estasyon sa radio, “DXGN” ug uban pang proyekto sa Simbahan sa Diyosis.

Daghang salamat sa mga kaparian og tanang mga tawo nga sa kanunay nagpadayon pagtabang nga ang apsotolado sa mga madre sa Daughters of St. Paul makapadayon dinhi sa siyudad sa Davao, South og North Cotabato, Mati, Tagum, Davao Oriental, Davao Occidental, Davao del Sur og uban pa. Salamat usab sa mga sakop sa Pauline Family ilabi na ang Association of Pauline Cooperators nga walay hunong sa pagsupoorta sa tanang mga proyekto sa mga Paulines sa Mindanao.

Labaw sa tanan, daghang salamat sa Mga Obispo ning mga probinsya nga ginganlan sa unahan ug kang Archbishop Romulo C. Valles sa Archdiocese sa Davao.

Kaninyong tanan, Daghang Salamat!

(Sr. Rica Dalaguit, FSP)