Civic, relihiyosong pundok nagkahiusa sa Guihing

NAGSAULOG sa iyang tuig nga kasumaran ang Brgy. Guihing, Hagonoy Davao del Sur pinaagi sa misa niadtong Mayo 31. Ang pamalandong sa parish administrator sa Our Mother of Perpetual Help (ang parokya sa maong Barangay) Fr. Rico Dingal, JCL, mipunting sa duha ka puntos: Una, ang pagpalawom sa Santisima Trinidad nga naglangkub sa 3 ka persona nga nagpakita og hiniusang relasyon sa Ginoong wala nag-inusara. Ikaduha, ang selebrasyon adunay koneksyon sa kapistahan sa Barangy kay natunong sab kini dili lamang sa adlaw’ng Domingo, kundili sa kapistahan sa Santisima Trinidad.

Ang realidad sa pagkabahin-bahin mahitungod sa relihiyon, pinulongan, prinsipyo, kinaiya, etc. nagkahiusa diha sa pagselebrar. “There is unity in diversity,” matud pa niya. Mipasibaw usab sa iyang gibati si Jesus ‘Jai’ Dureza, kasamtangang kapitan sa maong Brgy. Iyang gisugid nga bisan nagkalain-lain ang tinuohan, nagkahiusa ang mga Guihingenos sa pagselebrar sa maong kapistahan.

Matud usab niya, ikumpara sa niaging kapistahan, mas sadya ug mas mabulokon kini nga selebrasyon. Daghan usab ang nagtimbaya sa maong okasyon, sagad mga politiko sa dakbayan sa Davao Del Sur ug mga kasilinganang dapit sa nasud Pilipinas. (Sem. Ariel L. Maglupay | MAGSAYSAY)