Bokasyon sa pagka-pari nadungagan sa Diyosesis sa Kidapawan

KIDAPAWAN CITY—Bisan pa sa kamingaw tungod sa kawad-on nila’g Obispo sa Diyosesis sa Kidapawan, gikalipay sa mga magtotoo ang pag-ordina sa pagka-pari ug pagka-diyakono sa upat ka batan-on.

Niadtong Mayo 25, dakong kasaulogan sa tibuok Diyosesis sa Kidapawan ang ordinasyon ni Fr. Armando Labora, Fr. Rex Douglas Sungcad ug Fr. Remejun Dagon pinaagi sa pagpandong sa kamot sa ilang kanhing Obispo ug karon Arsobispo sa Zamboanga nga si Archbishop Romulo T. Dela Cruz didto sa Mary Mediatrix of All Grace Cathedral, Kidapawan City.

Dako usab ang kalipay nila nga si Sem. Vicney Jalico gi-ordinahan usab sa pagka-diyakono sulod sa maong kasaulogan.

Gihatagan ni Abp. Dela Cruz ug tig-isa ka minuto ang mga bag-ong pari ug diakono una gisugdan ang rito sa ordinasyon aron mu-desisyon kung kabubut-on ba nila ang magpa-ordina.

Giingnan usab ni Abp. Dela Cruz ang mga bag-ong orden nga hinumdoman nila ang giingon ni St. John Vianney, patron sa mga pari nga: Magsaulog sila og Misa kada adlaw maski walay tawo, mag-ampo sa Breviary kon Liturgy of the Hours, ug mangompisal kada bulan.

Gi-awhag usab niya ang mga katawhan nga iampo ang mga bag-ong mga pari ug diakono nga magpabiling pari hangtud sa kahangturan tungod lisud ang magpabiling pari karong panahona, sumala niya.

Sa pagkakaron, midawat na sila sa ilang bag-ong katungdanan isip parochial vicar ug formator. Si Fr. Dagon maoy bag-ong parochial vicar sa Sto. Niño de Cebu Parish sa Makilala, si Fr. Labora maoy parochial vicar sa Christ the King Parish sa Kabacan ug si Fr. Sungcad maoy vice-rector ug dean of seminarians sa Our Lady of Guadalupe Diocesan Seminary.

Si Rev. Jalico na-assign sa Bishop’s Residence sa Kidapawan alang sa iyang diaconal program. Siya maoy mu-abag sa mga kaparian sa ilang mga buluhaton sa nagkalain-laing parokya sa diyosesis.