Bangon!

Ikanapulo’g tulo nga Domingo sa Ordinaryong Panahon
Kaalam 1:13-15; 2:23-24/ Ps. 30/ 2 Cor. 8:7, 9, 13-15/ Mk. 5:21-43

Duna bay niduol kanimo aron magpakitabang? Duna bay nangayo kanimo og pagkaon kay siya gigutom o nangayo’g pamasahe aron siya makauli sa ila? Duna bay nihangyo kanimo og kwarta aron ikapalit og tambal o nihangyo nga siya hatagan mo’g trabaho aron duna siya’y kapaninguhaan?

Sa Ebanghelyo, si Kristo gidangpan ni Jairo nga mihangyo nga ayuhon ni Hesus ang iyang anak ug sa usa ka babaye nga nagsige’g dugo nga misuot sa katawhan aron lamang makahikap sa bisti ni Hesus aron mamaayo. Kining duha, mga tawong napukan tungod sa sakit, sa kalisud, sa kapait. Sila nagpakitabang kang Hesus. Ug sila wala talikdi apan gikuyogan ni Hesus ug giayo.

Bisan pa man sa kadaghang tawo nga mialirong kaniya, ang babaye nangita’g pamaagi nga misuot sa duot sa mga tawo aron siya makahikap kang Hesus. Bisan pa man sa mga sinugo gikan sa balay ni Jairo nga miingon kang Hesus nga patay na ang anak ni Jairo, misalig ug mituo gihapon si Jairo nga dunay mahimo si Kristo.

Sama niining babaye nga giayo ni Hesus ug sa anak ni Jairo, kita usab mahimong mobangon gikan sa pagkapukan sa pagsulay sa sakit ug kalisod. Kinahanglan lamang modangop ug mosalig kita kang Hesus. Kita mamaayo. Kita malig-on. Kita tabangan sa Ginoo diha sa atong hugot nga pagtuo nga Siya Dios sa kinabuhi ug dili sa kadaut matud pa sa unang pagbasa. Kini gitubag nato sa Salmo nga dalaygon ang Dios nga nagluwas kanato.

Sayod kita nga gigrasyahan kita sa Dios, matud pa sa ikaduhang pagbasa. Busa giawhag kita sa pagpaambit sa atong kahibalo, sa mga abot sa atong kakugi, sa atong panahon ug talento, ug sa bisan unsay atong matunol sa nanginahanglan. Paninguhaon ta nga kita maoy motabang kaysa kita ang tabangan aron gikan sa atong pagkapukan sa kalisod kita makabangon.