Si Mary Jane ug Maria Kristina

Samtang ginasulat nako kini, ang “Human Trafficking” nga akong gihisgutan sa mga miaging Dominggo, nahatagan ug dugang kahulugan tungod sa duha ka ngalan, duha ka nawong, sa duha ka babaye nga suspetsadong nahilambigit sa “human trafficking.” Sila Mary Jane Veloso ang biktima, ug ang iyang kaila ug silingan, nga si Maria Kristina Sergio, ang reruiter/trafficker.

Si Mary Jane Veloso, nadakpan nga nagdala og illegal nga droga, didto sa Indonesia; na sentensyahan sa kamatayon, apan wala madayon tungod sa mando sa Presidente sa Indonesia. Si Maria Kristina, ni surrender sa kapulisan og gi-imbistegar pa sa karon, kon unsay iyang kalambigitan sa kaso ni Mary Jane, ug kinsa pay laing mga tawo nga apil niining krimen.

Sa unang gula pa lang sa media sa kaso ni Mary Jane, miulpot dayon sa akong kamatngonan ang gidala niyang ngalan—MARY JANE. Paghuman, paggula pud sa recruiter, mao gihapon ang akong gibati. MARIA KRISTINA ang iyang ngalan. PASTILAN! Parehas man diay kini sila mga Maria, sama sa ngalan sa Inahan ni Jesus, ang Inahan sa tanang katawhan.

Nakahunahuna dayon ko nga mga KATOLIKO man tingali ni sila. Dili ba kita ra man mga Katoliko ang kasagaran nga hingalan og Maria. Unya doble pa jud ni sila kay, si JANE ug KRISTINA, nagapahinumdum kanato ni San Juan ug sa Ginoong Hesu Kristo mismo. Dili usab imposible isip mga Katoliko, nga tingali nahimo pud ni sila kaniadtong mga anghel sa Sugat ug sa Flores de Mayo.

Ay! Mga hunahuna ra ni tingali nga naghinobra ug walay basihanan sa realidad. Apan, tinuod man kining tanan o dili, nasubo kong hunahunaon nga ang nindot nga mga ngalan nila, wala makadasig o makatultol kanila sa pagkinabuhi nga matarong, mahigugmaon ug mapailobong nagapanaw uban sa Dios. (Mk. 6:8) Wala na namatngoni sa ilang mga pamilya ug sila mismo ang kahulugan sa ilang mga ngalan.

Nahinumdum ko sa usa ka higayon, nga duna koy gibunyagan nga gitagaan sa ngalan nga “Skylab.” Gipangutana nako ang ginikanan ngano mao kadto ang ngalan sa bata. Matud nila, gipanganak ang bata sa adlaw nga nahulog ang skylab sa yuta gikan sa space. Wala nako mahibalo kon na pilot o astronaut ang maong bata.

Kompirma pud. Usa ka higayon duna koy gikompirmahan nga ginganlan og “Marsha Lu.” Human sa kompirma, gipangita nako ang dalaga ug gipangutana bahin sa iyang ngalan. Ingon siya nga matod sa iyang Papa, natawo siya sa adlaw nga nag Martial Law si kanhing Presidente Marcos. Pastilan!

Karong Mayo, sama sa naandan, nag Flores de Mayo na usab ang mga Parokya. Hinaot unta, nga mogawas na kita sa naandang pamaagi. Dili lang kita kutob sa pagrosaryo, pag-awit sa Mahal nga Birheng Maria, pagprosesyon, painit, ug uban pa.

Atong ipahigmata sa mga kabatan-onan ang mga hiyas sa atong Mahal nga Inahang Maria, nga mapuslanon ug makahuluganon alang sa kinabuhi. Matun-an unta sa mga kabatan-onan ang lain-lain nga higayon ug kahimtang kanus-a mapuy-an kining mga hiyas. Mahunahunaon sa uban, matinabangon, matoohon ug masinugtanon sa pagbuot sa Dios, kaputli sa hunahuna ug lawas, mapailobon ug masaligon gayud sa Dios, maampoon. Kini ang pipila ka mga hiyas nga sulundon ni Birheng Maria.

Sa katapusan, kinahanglan dunay pamilya, katilingban nga magasaksi niining mga hiyas ngadto kanila. Kon kutob lang sa pagtudlo sa pulong, dili kini katoohan ug labaw nang dili sundon. Kinahanglan dunay magpakita kanila sa buhat niining mga diosnong hiyas. Sa ato pa, dili nato kalimtan nga ang kinahanglan karon, dili lamang mga magtutudlo, apan mga saksi usab nga magmatuto sa mga kabatan-onan.

Viva Maria! Viva Jesus! O Birhen sa Fatima, ig-ampo mo kami.