SFC-CLP, daku ang matabang sa batan-on

Uban ang tumong nga mapaila-ila si Kristo sa tanang ulitawo ug dalaga, ang Singles for Christ community nagapahigayon sa Christian Life Program (CLP). Kini usa ka pormasyon diin imbitado ang tanang 21 hangtud 40 anyos aron sa pagtuon ug pagpalalum sa ilang pagsabot sa kinabuhing Kristohanon.

Ang mga miyembro gikan sa Panacan, Tibungco, Bunawan ug Lasang nagpahitabo niining programa sa nagkadaiyang mga parokya: San Miguel (Panacan), St. Francis Xavier (Tibungco), San Pedro-San Pablo Chapel sa Bunawan, ug Brgy. Hall sa Lasang.

Sulod sa 12 ka Dominggo, ang mga partisipante ginatagaan ug nagkadaiyang mga pagtulon-ang Katoliko. Nagsugod ang maong tinuig nga programa niadtong April 19, 2015, ug gilaumang mahuman sa Hulyo 5, 2015. Mamahimo pang magparehistro hangtud May 3, 2015 pinaagi sa pag-adto sa naasoy nga mga venues, 1:00 sa hapon. Ang CLP libre.

Ang Singles for Christ (SFC), mao ang singles ministry sa Couples for Christ Family Ministry, nga naninguha nga mapahiduol si Kristo sa matag ulitawo ug dalaga sa tibuok kalibutan.

Ang DCH Marketing Manager ug SFC member nga si Francis John Palar, mituo nga mitaas ang iyang confidence sa kaugalingon sukad sa iyang pag apil sa maong seminar. “Mas sayon atubangon ang problema nga ginaatubang sa mga singles pinaagi niining programaha.” (Julius Gomez)