Santisima Trinidad: Kahiusa, Kamasinugtanon, Kalig-on

Dt. 4:32-34, 39-40/ Ps. 33:4-6, 9, 19-20, 22/
Rom. 8:14-17/ Mt. 28:16-20

Ang tatsulok o triangle usa sa mga simbolo nga gigamit sa pagpasabot sa Santisima Trinidad, usa ka Dios sa tulo ka persona. Gigamit usab ang imahen sa usa ka kahoy nga adunay punuan, dahon ug bunga. Ug sa nauso na ang three-in-one shampoo or three-in-one nga kape kini gipresentar nga hulagway sa usa ka Dios sa tulo ka persona.

Bisan dili sayon masabtan kining maong pagtulon-an, kini hugot natong gituohan. Mao kini ang gisugo ni Hesus sa iyang mga tinun-an nga mamunyag sa ngalan sa Amahan, ug sa Anak, ug sa Espiritu Santo. Kini atong ilitok sa matag panguros nato.

Sa kasinatian ni Moises uban sa katawhan, ang Dios usa ra. Siya Dios sa langit ug yuta nga nagpakaon, nanalipod ug nagpangga sama sa usa ka amahan sa iyang katawhan. Ang mga tinun-an ni Kristo nakaila kaniya isip anak sa Dios nga nahiusa sa Amahan. Ang tanan nga buot isulti sa Amahan nahimo ni Kristo. Siya ang pagpadayag sa Dios Amahan. Ug sa iyang pagbiya, gibilin niya ang Espiritu Santo nga maoy maglig-on sa Simbahan. Kini ang Espiritu nga makahimu sa katawhan nga makatawag sa Dios nga “Amahan.” Sukad sa sinugdan ug sa kanunay nahiusa ang Dios Amahan, Anak ug Espiritu Santo.

Kita gipahimangnuan karon nga, una, ang tanan nahiusa nga mga anak sa Dios Amahan ug giawhag sa pagdawat ug pagsabut sa mga huyang, nahisalaag, ug nahilayo. Ikaduha, sama nga si Hesukristo, ang Dios anak nagpamasinugtanon, kita usab gitawag sa pagkamasinugtanon diha sa atong mga ginikanan sa atong pamilya, sa atong mga pangulo ilabina sa mga kaparian diha sa Simbahan, sa atong labaw diha sa atong pagpanarbaho, ug sa Dios diha sa matag adlaw. Ikatulo, kita malig-on unta sa Espiritu nga maoy kahayag, pagbag-o ug kahiusa. Siya bisan dili nato makita, atong mabati ug masinati sa lig-on nga pagtuo.

Hinaut unta nga ang Dios Amahan, Anak, ug Espiritu Santo maghimu unta kanatong hiniusa, masinugtanon ug malig-on nga mga sumusunod ni Kristo.