Reaksyon sa Pacquiao-Mayweather Fight (Mati Newsbits)

Photo credit FREDERIC J. BROWN/AFP/Getty Images

DAGHAN ang nagpaabot gayud nga modaug si Manny Pacquiao sa “Fight of the Century” tungod usab sa iyang nabungat nga mga pulong nga pildihon niya si Mayweather, lakip mga kinutlo gikan sa Balaang Kasulatan nga: “God will deliver him into my hands…send 10,000 angels…I can do all things in Him who strengthens me.”

Tinuod anaa ang pagka-dismaya, apan migawas usab ang ka-sobra sa pagsalig ni Pacman sa iyang kaugalingong kusog, nga daw mura na siya’g Diyos nga makabuot sa unsay mahitabo. Kini usab ang nahisgutan tungod sa nakit-ang kahuyang sa ispirituhanong panlantaw sa Pambansang Kamao nga gitawag usab nga pastor sa iyang kaugalingong sekta.

Di ba kaha gitudloan siya’g leksyon sa Kahitas-an nga pugngan ang posibleng mogawas nga ispirituhanong arogansya. Gani, namatikdan nga sa interview, unang gipasalamatan ni Mayweather ang Ginoo, ug giila usab niya ang gilas ni Pacquiao, samtang wala malitok ni Manny ang susamang pagpasalamat ug mapaubsanong pagdawat sa pagdaog sa iyang kalaban.

Dakong Screen ug “Libreng Pay-per-view”

Gi-instalar sa probinsyal nga kagamhanan sa Davao Oriental ang big screen sa Capitol Covered Court alang sa “Fight of the Century” sa miaging Mayo 3.

Ang maong lakang ang agi’g paghatag og higayon sa katawhan nga makatan-aw sa away sa duha ka mga banggiitang boksidor nga dugay nang gikahinaman sa katawhan, kalakip na sa mga residente sa probinsya. Sa samang bahin, ang Trinity Cable Television (TCTV) ug DXHM-AM/DXDV-FM naghatag og full coverage sa pay-per-view nga gi-sponsoran sa managlahing mga sektor, ug kini nahimong available para sa tanan, bisan-asa man, lakip na sa Clergy Compound ug sa St. Therese Gym kon diin gibutang usab ang lain-laing mga screen para sa gustong motan-aw ug mo-cheer sa Pinoy boxing icon.

Pasidaan

Nagpagawas og pasidaan si Fr. Edito S. Baño sa katawhan sa Mati kabahin sa nagasuroy nga solicitation alang sa usa ka matud pa, pagaordenahan sa pagkapari. Walay kamatuoran sa ginganlan nga tawo nga ordinahonon, kon unauthorized, ug busa gisugyot ang tanan sa dili pagtuo sa maong nagakalat nga solicitation, sinulat man o verbal. (Sr. Marietta Alo, OND & L. Mahumot)