Paghigugmaay kamo

Ikaunom nga Domingo sa Pagkabanhaw
Buhat 10:25-26, 34-35, 44-48/ Ps. 98/ 1 Jn. 4:7-10/ Jn. 15:9-17

Human gibisita ug gidihugan sa pari ang usa ka masakiton nga babaye nga 30 anyos, gipangutana niya ang igsuon sa nasakit sanglit dili naman kaayo makasulti ang masakiton kung asa man ang bana sa nasakit. Ang igsuon sa nasakit mitubag: “wala naman nagpakita padre kay dili na daw niya maantus.”

Ang pari nakapangutana sa kaugalingon, unsa man gyud ang kahulugan sa tinuod nga gugma. Dili ba ang tawong nahigugma maghatag og kalipay, masinugtanon sa sugo ug motahan sa kaugalingon?

Sa mga pagbasa, si Kristo nga mao ang hulagway sa gugmang naghatag og kalipay. Buot niya nga mahingpit ang atong kalipay pinaagi sa pagsulti ngadto sa iyang mga higala sa tanang kamatuoran. Walay tumong niya kondili aron matudloan kita sa dalan sa tinuod nga kalipay. Tungod sa iyang gugma, buot niya nga hingpit ang atong kalipay.

Kung ang Dios atong gihigugma, makalipay kita kaniya kung kita hinimbahon, matinud-anon, matinabangon. Malipay siya kung atong giatiman ang tanang panginahanglan sa pamilya, materyal man o espiritwal, pisikal man o moral.

Ikaduha, si Kristo nag-awhag kanato nga ang gugma nagtudlo sa pagkamasinugtanon sa sugo sa Dios. Ang tawong nahigugma andam mosunod sa gisulti sa iyang hinigugma. Sayon sa nahigugma ang pagbuhat sa mga pulong sa gihigugma.

Kung nahigugma kita sa Dios, dili lisud kanato ang pagsunod sa sugo sa pagsimba matag-Domingo. Sayon kanato ang paghimu sa mga sakramento sama sa kasal, kumpisal, pagpabunyag, misa ug uban pa.

Ikatulo, si Kristo nagpahimangno nga ang gugma andam motahan sa kaugalingon. Kini naghatod niya sa pagpakamatay sa krus bisan wala siyay makuha gikan kanato, bisan kita nakasala, bisan kita nagmagahi. Gihimo niya ang tanan aron lamang atong mabati ang dakung gugma sa Dios.

Kung gihigugma nato ang Dios, dili nato igsapayan nga kita libakon tungod lamang kay matinud-anon kita. Dili kita manumbaling sa pagsaway tungod sa pagbuhat nato sa maayo bisan sa pagtintal sa uban.

Atong iampo nga ang Espiritu Santo magpaamgo kanato nga ang Dios maoy unang nahigugma kanato. Tubagon sa siya sa paghigugmaay sa usa’g usa.