Flores de Mayo attendance, mikunhod ba?

Sa unang isyu sa Diocese of Digos supplement, SUGID, among gipangutana ang pipila ka mga taga Davao del Sur sa ilang obserbasyon kabahin sa nagkaanam nga pagkahinay sa tinuig nga Flores de Mayo.

***

“Sa among GKK, mokabat ug usa ka gatos nga pamilya ang nasakop pero anaa ra sa mga 20 ka mga bata ang nagatambong sa Flores de Mayo nga nag edad ug 4-8 years old. Lahi ra gayud kaayo sa una sa akong nasinati nga daghan ming mga bata ang nagaapil. Siguro ang ubang mga bata kulang diha sa pagdasig sa ilang mga ginikanan ug kulang usab sa pagpasabot kung unsa kining Flores de Mayo diha sa atong kristohanong pagtoo.”

JULITO LANGUITA, JR., 21
Sta. Teresa de Avila Parish,
Malalag, Davao del Sur
GKK San Jose, Poblacion

***

“Usa sa akong naobserbahan karon ang nagkaanam ug kawala nga mag volunteer nga katekista matag Flores de Mayo. Tungod niini, nagkagamay usab ang mga bata nga muapil. Sa ato pa nagkaanam ug kawala ang kadasig sa katilingban sa GKK ang mopahigayon ug Flores de Mayo.”

LEONARD JAY RABUYA
GKK Inahan sa Kanunay’ng Panabang, Lubo Beach
St. Joseph the Worker Parish
Sta. Cruz, Davao del Sur

***

“Sa akong panglantaw nganong nagkaanam na ug kagamay ang mga bata nga moapil ug Flores de Mayo, una, tungod sa kulang pagtagad sa mga ginikanan diha sa pagdasig sa pagkamatuohon sa ilang anak. Ikaduha, tungod sa mga gadgets nga makalaylo sa atensyon sa kadaghanang bata. Imbis makighalubilo sa uban diha sa katilingban sa GKK, dili na langkay magdula naman lang mga computer games ug uban pa diha sulod sa balay.”

TOM FRANCIS ARADILLOS, 19
San Roque Sitio Barangay
Immaculate Conception Parish
Kiblawan

***

“Sa akong kasinatian diha sa among GKK diin kas-a nakafacilitate ko sa Flores de Mayo, daghan gihapon ang naga apil nga mga bata. Usa sa possible nga rason nganong daghan gihapon ang naga apil niining matag tuig nga kalihokan sa among GKK, kay ang makanunayong lamian nga painit nga ginaserve ngadto sa mga bata. Pero ang dako gayong hinungdan niini mao ang dakong pagdasig ug suporta sa mga ginikanan sa ilang mga anak. Muapil pa gane ang ginikanan ug paminaw uban ang ilang mga anak. Ang uban usab mao ang nagatabang sa maong buluhaton sa GKK.”

JAMES BRENSON ORQUE
GKK Sagrada Familia Poblacion
San Roque Parish of Sulop
Davao del Sur