FLA Facilitators’ Training, Gipahigayon

MALITA, DIOCESE OF DIGOS—Ang pag-alagad dili lang alang sa mga hamtong. “Samtang bata pa ta, mualagad na ta kay sayang ang panahon” sumala ni Cristopher Failma, usa sa 14 ka partisipante gikan sa nagkalain-laing GKK sa gipahigayon nga Facilitators’ Training sa Family and Life Apostolate (FLA) sa Sto. Rosario Parish (SRP), Malita Abril 24-26.

Tumong sa maong training ang pagpalambo sa kahanas sa mga parokyano ubos sa ministriya sa pagpanudlo diha sa parokya ug GKK.

Pinaagi sa mga speakers: Aquilino L. Baña, Rolando A. Fabiaña, kanhing Diocesan FLA Trainors-Facilitators, nakahibalo ang mga partisipante sa mga epektibong pamaagi kung unsaon mamahimong maayong facilitator.

“Nakaamgo ko nga kinahanglan pa gayod ko ug dugang nga mga inputs kay kulang pa gayod ang akong kahibalo as facilitator,” matod pa ni Estela Calderon.

Nanghinaot si Fr. Kim Cossid, DCD, ang Kura Paroko ug Fr. Richard Laquinon, DCD, FLA Spiritual Director, nga pinaagi niini, mas malig-on pa ang misyon nga gipahingusgan ug ginapadayon sa FLA sa maong parokya. “Salamat sa Dios! Sa dugay nga panahon sa paghulat, naabot ra gayod.”

Gihimo ang maong sending forth sa mga partisipante niadtong Mayo 3, 2015 sa simbahan. (Jocelyn Basunillo | Fheil Karl Failma)