Ang Espiritu Santo naghimo kanato nga mga anak sa Dios ug balaan nga katawhan

Domingo sa Pentekostes
Buhat 2:1-11/Ps. 104/1 Cor. 12:3-7, 12-13 or Gal. 5:16-25
Jn. 20:19-23 or Jn. 15:26-27; 16:12-15

KARONG adlawa sa atong pagsaulog sa Pagkunsad sa Espiritu Santo (Pentecost) atong gisaulog ang pagka-himugso sa Simbahang Katoliko.

Pinaagi sa pagkunsad sa Espiritu Santo ngadto sa mga apostoles ug sa mga unang tinun-an natukod ang Simbahan.

Niining kapistahan sa tibuok Simbahan, gipahinumduman usab kita sa gasa sa Espiritu Santo sa atong kinabuhi. Sa panahon sa atong bunyag ang Espiritu Santo naghimo kanato nga mga anak sa Dios, ug naghimo kanatong mga sakop sa Lawas ni Kristo.

Siguro makapangutana kita karon, unsa man ang epekto sa Espiritu Santo diha sa atong kinabuhing Kristohanon?

Ang espiritu dili nato makita pero atong mabati ang epekto niini sa atong kinabuhi. Binasi sa mga pagbasa karon adunay tulo ka mga epekto nga atong makita o mabati isip timaan nga ang Espiritu Santo nagalihok diha sa atong kinabuhi.

Una, ang Espiritu Santo naghiusa sa katawhan sa Dios. Diha sa unang pagbasa sa buhat sa mga apostoles atong nadungog nga paghuman sa pagkunsad sa Espiritu Santo ngadto sa mga tinun-an, nahimo sila nga mga maisugong magsasangyaw sa maayong balita sa kaluwasan. Ang mga tawo nga nakadungog kanila, bisan pa ug gikan sa nagkalain-laing dapit ug nagsulti sa nagkalain-laing pinulongan, nakasabot sila sa mensahe nga gisulti sa mga tinun-an tungod kay sila nagsulti man pinaagi sa gahum sa Espiritu Santo. Ang Espiritu sa Dios nag-aghat kanato sa pagsulti sa pulong sa paghigugma ug walay tawo nga dili makasabot niini. Ang Espiritu sa Dios magwagtang sa pagkabahin-bahin ug sa mga panagbingkil kay Siya man maghiusa kanato ngadto sa usag-usa.

Ikaduha, ang Espiritu Santo nagtukod sa katilingban ug naghiusa kanato ngadto sa usag-usa. Ang katilingban ug pamilya nga nabungkag ug nagkabahin-bahin wala kini nagpuyo sa diwa sa Espiritu sa Dios. Ang dautang espiritu nagabungkag o nagabahin-bahin sa katilingban apan ang epekto sa Espiritu sa Dios nagahiusa kanato isip mga anak niya. Kung asa adunay panag-away, pagdumot ug pagdaot sa usag-usa dili kana iya sa Dios, kay ang mga bunga sa Espiritu Santo mao ang paghiugugmaay, panag-uliay, pag-alagad ug pagtahod sa usag usa. Ang bunga sa Espiritu Santo mao nga matukod ug mahiusa ang katilingban.

Ikatulo, ang Espiritu Santo mao nagbalaan kanatong tanan isip mga anak sa Dios Amahan. Pinaagi sa gasa sa Espiritu Santo kitang tanan magiyahan sa pagsubay sa dalan sa katarong ug sa kabalaan. Ang Espiritu sa Dios ang magdala kanato ngadto sa Dios. Ang atong tinguha nga mahaduol sa Dios ug mosubay sa Iyang kabubut-on, kining tanan gikan sa Espiritu Santo nga maoy nagalig-on kanato batok sa mga tentasyon ug mga panulay. Kung kita makasala, ang Espiritu sa Dios mao ang mag-aghat kanato sa pagbalik sa Dios pinaagi sa pagduol sa sakramento sa Pagpakig-uli.

Sa atong pagsaulog karon sa pagkunsad sa Espiritu Santo, siguro maayo nga mangutana kita, unsang klase nga espiritu ang nagalihok sa akong kinabuhi karon? Ang espiritu ba sa kadautan diin ang mga epekto niini mao ang pagdumot, pagkahakog, pagdaut, pagkabahin-bahin o ang Espiritu ba sa Dios diin ang mga bunga niini mao ang paghigugma, pag-alagad, panaghiusa ug pagpuyo sa kinabuhi nga balaan.

Hinaut nga ang Espiritu Santo mao gayud ang naghari sa atong mga kasing-kasing para makita gayud ug mailhan nga kitang tanan mga tinuod nga sakop sa Simbahang Katoliko—ang lawas ni Kristo ug tinuod nga mga anak sa Dios nga atong Amahan.

Malipayong piyesta kanatong tanan! (Fr. Orly Angelia)