Presyo Diskwento, Skills Seminar, Makatabang sa Kabus

SI NANAY Mariquita Talamani, usa ka Badjao, inahan sa tulo ka anak, mingdayo sa Davao gikan Basilan aron makapangayo ug hinabang.

Usa si nanay sa mga nawad-an ug bana tungod kay gitulis kini, samtang nanagat isip ilang panginabuhian. Sukad sa pagkawala sa iyang bana, naka desisyon siya nga dalhon ang iyang mga anak sa Sta. Cruz, Davao Del Sur tungod sa kagubot sa Basilan. Sa kasamtangan, sa Manila nanagat ang duha niini ka anak, ug ang usa ana sa Bangkerohan niining dakbayan, kauban ang kaugalingong pamilya. Tungod kay wala nakaeskwela, nahimo kining babag sa ilahang komunikasyon kay dili sila kabalo mosulat.

Balik sa Basilan nagahabi si nanay ug banig isip panginabuhian aron mabuhi iyahang mga anak sukad nawala iyang bana. Sa pagbalhin dinhi ug sa katigulangon, wala na kini nagpadayon.

Sa ato pa kung naa lang unta siyay gamit, isip babaye, p’wede pa siyang makasugod napud aron di na kini mudayo sa syudad aron manlimos.

Kon ang mga kababayen an sama niya adunay kahanas, dili na nila kinahanglan mangayo sa uban aron mabuhi.

TABANG SA KABUS

KINI ang usa sa mga panghinaut sa media apostolate atol sa pagselebrar sa World Communications Day (WCD). Kining caravan ug livelihood skills training ipahigayon sa Holy Cross College of Calinan. Kauban ang mga partners, Department of Trade and Industry, Holy Trinity Community, Sacred Heart Parish Vicariate ug uban pa, ang mga kabus, adunay mapalit sa ubos nga presyo nga mga school supplies, ug uban pa. Aduna usab livelihood skills training sama sa CASH-L (Vermi Composting and Urban Gardening) sa 40 ka partisipante, Beadwork sa 20 ka batan-on, ug Manicure/Pedicure sa 20 ka babae.

Matod pa sa panultihon:

“Tagai ang tawo ug isda sa usa ka adlaw ug napakaon nimo siya sa usa ka adlaw; tudlui siya mangisda ug mapakaon nimo siya sa iyang tibuok kinabuhi.”

Kining kahanas nga ilang matun-an sa training, makatabang aron sila dili na magsalig pa. (Janin R. Langoy)