Pagtuo: Personal ug Katilingbanon

Ikaduhang Domingo sa Pagkabanhaw
Buhat 4:32-35/ Ps. 118/ 1 Juan 5:1-6/ Juan 20:19-31

Nakamatikod ang pari ang aktibo niya nga tiglimpyo sa simbahan panahon sa kasal wala na nagpakita. Busa gibisita kini niya ug naabtan sa ilang balay nga nagsunog sa mga sagbot sa palibot. Ang pari miingun,“Nay kumusta, wala naman ka nagpakita sa simbahan?” Mitubag ang babaye, “Maayo pa Padre mag-inusara na lang ko kay dili man mosunod sa akong mga sugyot ang akong kaubanan.” Ang pari mikuha ug sanga sa kahoy gikan sa gisunog nga mga basura ug miingon, “unsay nahitabo aning kahoy, Nay?” “Napalong kay imu mang gikuha gikan sa daub sa kalayo,” mitubag siya. Ang pari miingon, “Maingon usab niini ang tawo nga magpahilayo, mapalong ang siga sa iyang pagtuo.”

Ang personal nga pagtuo gihulagway diha sa pagtuo sa matag usa nga nadungog nato sa ikaduhang pagbasa. Diha sa sariling paghigugma sa Dios ug pagsunod sa iyang mga sugo ang tawo magmadaugon batok sa sala.

Apan kining patuoha kinahanglan atong mapuy-an uban sa katilingban. Mao nga diha sa unang pagbasa, ang katilingban nahiusa diha sa kasing-kasing ug huna-huna. Kini ilang gipakita diha sa pag-ambitay sa mga butang nga ilang nahuptan.

Kung mopahilayo kita sa katilingban, mapalong ang siga sa atong pagtuo sama ni Tomas diha sa ebanghelyo. Kung mag-inusara na lamang kita, dili molambo ang atong pag-ila sa Dios. Diha lamang sa atong pagpakiglambigit sa atong isigkatawo kita malig-on sa pagtuo.

Bisan pa man kining maong proseso nagkinahanglan sa pagtandog sa atong mga samad, kini angayan natong again aron maangkon nato ang kaluwasan. Sama nga diha sa pagpakita ni Kristo sa iyang mga samad nahiusa ug nagmalinawon ang iyang mga tinun-an, kita usab kinahanglan makasinati sa daghang mga samad sa pagsalikway, pagsaway, paglutos ug uban pa aron kita makadawat sa kalinaw ug kalig-on sa pagtuo.

Ang ikaduhang Domingo sa Pagkabanhaw giila nga Domingo sa Diosnong kaluoy. Gipromotar ni Santa Faustina ang puangod sa Dios sa tagsa-tagsa ug sa atong katilingban kay ang kaluwasan sa Dios nga angay natong tubagon sa tiunay nga pagtuo, personal ug katilingbanon.