Pagtagad ug pagpakabana

Ikaupat nga Domingo sa Pagkabanhaw
Buhat 4:8-12/ Ps. 118/ 1 Jn. 3:1-2/ Jn. 10:11-18

Usa sa mga namatikdan nato sa mga bag-ong tubo mao nga ipalapus lamang nila sa pikas dalunggan ang atong gisulti. Human kita nagpasabot, dali lamang nila kini malimtan. Kung sila atong suguon, dili dayon mobuhat. Gisulat ni Papa Francisco sa “Evangelii Gaudium” nga ang tawo karon dunay pagkulang sa pagtagad ug pagpakabana, dili manggilabot sa palibot.

Sa unang pagbasa, nasinati ni Kristo ang walay pagtagad ug pagpakabana sa katawhan. Gani, siya ang bato nga gisalikway apan nahimong uluhang bato sa kanto. Kini gipadayon pagsangyaw nila ni San Pedro ug mga kauban.

Sa ikaduhang pagbasa, hilabihan ang gugma sa Dios kanato nga gitawag kitang iyang mga anak. Apan wala kita mailhi ug wala gitagad kay wala man mailhi ang Ginoo. Gisalikway sa kalibutan ang Dios.

Hinunoa, ang Dios, si Kristo nga Maayong Magbalantay, nagtagad ug nagpakabana kanunay. Siya nagtagad sa matag-usa kanato kay wala siya molihok tungod sa suhol lamang kondili tungod sa gugma. Andam siya nga magpasakit aron kita maluwas. Dili niya igsapayan ang kamatayon aron kita mahatagan sa tinuod nga kinabuhi. Gihalad niya ang iyang kaugalingon bisan wala siyay makuha nato aron lamang kita maluwas.

Kini dakung hagit sa gobyerno. Pipila kaha kanila ang maayong magbalantay nga dili molihok lamang kung dunay makuha nga salapi? Pila kaha kanila ang moalagad sa tinuoray isip husgado o mayor, isip opisyal sa barangay nga dili tungod sa suhol o kwarta?

Ikaduhang hagit kini sa Simbahan. Pipila kaha sa mga alagad ang kinasing-kasing nga motabang sa kabus bisan walay ikabalus? Pila kaha kanila ang padayong motahan sa kaugalingon bisan walay pasidungog o suhol?

Hagit usab kini sa matag-usa. Isip ginikanan, padayon ba kitang nagtudlo sa atong mga kabataan bisan daw wala kita panumbalinga tungod sa daghang kahilayan karon? Isip anak, andam ba kitang mosunod sa atong mga ginikanan sa pagbuhat og maayo bisan kantiyawan ug isalikway kita sa atong mga barkada? Diha sa atong mga trabaho, matinud-anon ba kita bisan walay nagtan-aw kanato?

Makaambit unta kita sa kinaiya sa Maayong Magbalantay. Bantayan ta ang atong kaugalingon nga dili madala sa linlang sa dautan. Mahimo unta kitang katawhan nga adunay pagtagad ug pagpakabana.