Mati Carmel Triduum for St. Teresa’s 5th centenary (Mati Newsbits)

Mati Carmel Triduum for St. Teresa’s 5th centenary—Naghalad og tulo ka adlaw nga ispisyal nga kasaulogan sa Sakripisyo sa Eukaristiya ang komunidad sa mga Madreng Carmelita sa Order of Discalced Carmelites (OCD) sa ilahang Carmelite Monastery Church sa Tua Tua, Mati City, niadtong Marso 26-28, 2015, alas 5:30 sa hapon, agig pagtimaan ug pagpasalamat sa Diyos sa ika-500 o ikalima nga sentenaryo nga kasumaran sa adlaw’ng natawhan sa ilahang pundadora, patrona ug reformer, ang labing unang babayeng “Doctor of the Church” Sta. Teresa de Hesus/Sta. Teresa de Avila.

Si Most Rev. Patricio H. Alo, D.D. maoy nag-preside sa mga Triduum Masses ug naghatag sa iyang Thanksgiving Message antes sa Last Blessing. Lain-laing mga pari ang nagwali sa matag kasaulogan sa Misa: si Fr. Rey Jude Albarando, SDB sa unang adlaw, Fr. Pedrito P.Mapayo sa ikaduha, ug Fr. Edito S. Baño, apostolic administrator, sa ikatulo. Daghang mga deboto ang miduyug usab sa maong dakong kasaulogan sa pamilya Carmelita, ug naminaw ug namalandong sa mga mensahe nga gikauyukan niini nga gikutlo sa usa sa mga balak (poem) ni Sta. Teresa nga giulohan ug “Sa mga Kamot sa Diyos” (“In the Hands of God”), ug ang napiling motto sa ikalima nga sentenaryo mao ang mga pulong: “Para Kanimo Ako Natawo…Unsay gusto mo kanako” (“For You I Was Born…What do You want of me?”).

Sa iyang pagdapit sa katawhan, si Mother Ma. Lourdes of the Immaculate Conception, OCD, prioress, ang nagsugyot nga himoon ang Triduum kabahin sa pagpangandam sa kaugalingon sa umaabot nga mga Misteryo Pascual ning hinapos nga semana sa Kuaresma nga mosulud na sa Semana Santa.

Congratulations! Sa ika-51 nga anibersaryo sa pagkapari ni Obispo Emerito Patricio H. Alo niadtong Marso 14, 2015, usa ka adlaw sa simpleng pagpasalamat nga nahimong solemne usab sa pag-preside ni Bp Pat sa Solemn Profession and Veiling ni Sr. Mary Veronica of the Holy Face, OCD (Maria Nancy I. Sy) nga taga Davao City sa Carmelite Monastery Church, 10:00 am. Si Fr. Alan Reiger, OCD, ang homilist sa maong okasyon, nagwali kabahin sa buhi, biblikanhon, makanunayon ug maantusong gugma sa Diyos, pinasikad sa motto ni Sr. Veronica nga “I have loved you with an everlasting love.” Sa gabii, nagdalit og anniversary dinner alang kang Bp. Pat ang San Nicolas de Tolentino Cathedral.

Sa mga anibersaryo sa mga sibyahanang Catoliko sa diyosesis sa kapistahan ni San Jose, Marso 19: ika-24 alang sa DXHM-AM ug ika-6 alang sa DXDV-Spirit FM. Naghalad ang tibuok pwersa sa duha ka sibyahanan og Misa Pasalamat sa Clergy house chapel, pinangunahan ni Bp. Pat inubanan ni Fr. Ed nga mao say station manager, ug ubang kaparian. Nagdalit usab ang radio stations og snacks ug paniudto alang sa mga mitambong, ug sa gabii nagtugtog ang bag-ong nahimugso nga Lim-ao Band sa mga disc-jockeys (DJs) sa stage sa DXHM samtang nag-awit ang mga talentadong sakop sa radyo. Sa Marso 15, domingo, gihimo ang unang quarterly outreach sa tuig pinaagi sa paglingaw sa Lim-ao Band ug pagpakaon usab sa mga batang babaye sa Reception Study and Detection Center (RSDC), usa ka rape crisis center sa siyudad sa Mati.