Kalipay sa Pagpangalagad

“DAKO kaayo ang kalipay nga akong gibati sulod niining akong kasing-kasing karon tungod sa Ginoo,” matud pa ni Christian Glomar Coronado, usa ka Pangulo sa Batan-on (PSB) diha sa parokya ni San Miguel, atol sa ilang sending forth o pagbag-o sa ilang panaad diha sa pagpangalagad sa parokya, niadtong Marso 29, 2015.

Ang maong pagpadala gipangunahan sa kura paroko Fr. Proceso G. Gimeno Jr., kauban ang bag-ong giordinahan nga pari sa Sons of Saint Anne Congregation nga si Fr. Rey Sabuero, SSA.

Dayag kaayo sa dagway sa kura ang kalipay nga iyang gibati sa dihang giindosar diha sa iyang atubangan ang mga bag-o og daan nga mga pangulo nga naggikan sa unom ka mga ministriya nga anaa sa parokya: Pangulo sa Katilingban (PSK), Pangulo sa Alagad (PSA), Pangulo sa Batan-on (PSB), Pangulo sa Katilingbanong Banay (PSKB), Pangulo sa Pagpanudlo (PSP), ug Pangulo sa Liturhiya (PSL). Gidayeg niya sila nga naggikan sa nagkadaiyang GKKs sa maong parokya pinaagi sa iyang paghatag og bendisyon. Daku usab ang pasalamat og pagdayeg nga gihatag sa mga pangulo balik ngadto sa Diyos, pinaagi sa pagsalig nga gihatag kanila.

Matag tuig ginahimo sa parokya ang pagpadala sa mga pangulo diha sa GKK aron sa pagpadayon sa misyon sa Simbahan nga mao ang pagsangyaw sa maayong balita sa atong kaluwasan. (Rusty Corsame)