“Halad sa Kabus alang sa Kabus”

Ang Domingo sa Lukay giproklama nga Domingo sa “Alay Kapwa” sa tibuok Simbahan sa Pilipinas. Kini usa ka programa nga namugna niadtong Enero 31, 1975, pinangulohan sa Catholic Bishops’ Conference of the Philippines (CBCP). Ang gitugyanan nga modumala niini mao ang National Secretariate for Social Action-Justice & Peace (NASSA-JP).

Niining Tuig sa Kabus, ang Simbahang lokal sa Dabaw naglaum nga mas molalum ang atong pakiglambigit sa pagtabang sa kabus. Gisangon sa Archdiocesan Social Action Center (ASAC) ang pagpalusad sa “Halad sa Kabus alang sa Kabus” niadtong Pebrero 22 sa mga parokya ug matapos sa Domingo sa Pagkabanhaw Abril 5. Ang matigum nga pondo itabang sa panahon sa mga kalamidad.

Bisag walay mga kalamidad, isip membro sa Simbahan, atong katungdanan ug katungod ang paghuna-huna ug pagpangilabot aron makatabang sa kabus. Abli unta kanunay ang atong kaugalingon sa pagpaambit sa atong panahon, bahandi ug talento alang sa nanginahanglan. Naglihok unta ang atong pamilya, GKK ug parokya alang niining maong programa.