Drop-in Center sa BaPas, giablihan. Mga bata, gipili ang ngalang ‘Pope Francis’

DILI lang sa kaulohan bida si Santo Papa Francisco.

Pati ang mga bata sa Foundation of Balay Pasilungan (BaPas), Inc. gipili ang pangalan ni Pope Francis sa gibuksan napud niining Drop-in Center sa Bankerohan, niining dakbayan, niadtong Abril 6. “Nagmeeting mi, naa mi sharing unsay gusto ipangalan sa bag-ong balay, wala man mi nakaadto ug Manila, tan-aw mi TV, unya naay usa ka bata, miingon, let us call our new home, Pope Francis,” sumala sa BaPas Director nga si Fr. Lionel Mechavez, sm.

Dala ang mga kandila, ang mga staff, bisita, supporters ug Marist Fathers ug Sisters miduyog sa blessing sa maong puluy-anan alang sa mga streetboys.

Dungag pa ni Fr. Mechavez, “…since daghan na kaayo ug mga bata, lisud kaayo ipanghalo tanan kay when I took over sa administration sa Balay Pasilungan in 2013, I find it difficult nga naa nami’y old boys nga naka-stay na sila for 3-5 years, sagulan nimo ug bag-o napud, ang imong program, mabungkag. Ang gihimo namo naa mi lugar sa mga bag-ong rescue gikan sa dalan ug ang uban manuktok ra.”

Nagsugod isip drop-in center niadtong 1989, ang BaPas midawat na ug mga mga street children nga gidala gikan sa city government ug mga concerned citizens. Sa pagkakaron, aduna nay pito nga mupuyo sa dugang niining balay.

“Nagagawas pud ko sa s’yudad. Nagalibot kauban ang lay Marist isip outreach. Kini ang among Street Education Program. Lisud kung mapugos ang bata kay mugawas ra gihapon. Sa hinay-hinay, kanta kanta sa dalan, ila ila then dayon, muuban na.”

Sa ika 26 nga kasumaran sa BaPas karong Mayo 4, nanghinaut ang Society of Mary nga “wala nay mga bata nga maglatagaw sa dalan. Hangtud naa pay bata sa dalan, ang BaPas magpabilin. Kini usa sa tulo nga ministries namo uban ang sa city jail ug mental hospital.”