Bag-ong Altar sa Divine Mercy Church (Mati Newsbits)

Bag-ong Altar sa Divine Mercy Church

Agi’g sumpay sa gipadala nga hamubong balita kabahin sa ika-9 nga kapistahan sa simbahan sa Divine Mercy Shrine and Parish sa siyudad sa Mati niadtong Abril 12, 2015, malipayong gisaksihan sa libo-libong katawhan sa Diyos ang solemneng pagbendita ug pagpasidungog ni Arsobispo Romulo G. Valles sa bag-ong dako nga altar, lectern, ug presider’s chair sa wala pa sugdi ang kasaulogan sa Santos nga Misa alas 9:00 sa buntag. Ang kanhi mas gamay nga mesang halaran ang gibutang sa kilid nga bahin, ug magsilbing side-altar nga dedikado sa laing imahe sa Diosnong Kalo-oy ug sa Birhen, Mediatrix of all Grace. Mikonselebrar usab sila si: Obispo Emeritus Patricio H. Alo, Apostolic Administrator Fr. Edito S. Baño, Parish Priest Fr. Bernard M. Albao, Parochial Vicar Fr. Orveil P. Andrade, ug Chancellor Fr. Pedrito P. Mapayo. Tanang parokyano ug mga bisita ang nipaambit sa gihikay nga salo-salo, samtang usa ka band concert sa stage atubangan sa simbahan nga nipasundayag sa Tocada band ug local talents, ug sa taga Baguio nga vocalist “Abet” Alberto ang nihatag og makahimuot nga kalingawan hangtud sa tungang-gabii sa fiesta.

Youth for Peace Movement

Magpasiugda ang Youth for Peace Movement (YPM) og usa ka Youth Leadership Summit sa Banaybanay karong katapusang semana sa Abril. Gibutyag kini ni Capt. Alex Mindalano sa 701st Infantry Brigade sa Philippine Army (PA). Gipahayag pa ni Mindalano nga dako ang ilang pasalamat sa mga kabatan-onan nga mitahan sa ilang panahon, talento, ug salapi aron magpalakat sa kalihokan nga andam usab nga suportahan sa PA. Kahinumduman nga sa miaging bulan gipatigayon sa YPM ang candlelighting ug Walk for Peace sa gabii sa Marso 14, 2015 didto sa Mati Park and Baywalk, agig pagduso sa dakung tinguha ug kalambigitan sa mga kabatan-onan sa pagpatunhay sa kahapsay ug kalinaw sa probinsya ug sa tibuok kapupud-an. Si Fiel Bulaong, YPM president, ang nagpasabot nga ang pagdagkut sa mga kandila maoy timaan sa panalangin alang sa kalinaw. Mitambong usab niini ang nagkalain-laing sektor sibil ug sibiko, ug relihiyosong pundok nga gi-representahan nila ni Fr. Edito Baño, Pastor Calibara, ug Imam Alim. Makanunayon nga gisuportahan ang YPM sa Philippine Army, sa pagpanguna ni Brigade Commander Bienvenido Datuin, Jr.

40 ka adlaw sukad namatay si Fr. Nelson

Gisaulog ang ika-40 ka adlaw sa kamatayon ni Fr. Nelson Inteligando Martinez niadtong Abril 11, Sabado, pinaagi sa paghalad og Misa konselebrada nga gipangunahan ni Obispo Emeritus Patricio H. Alo, alas 8:00 AM sa pantiyon sa pari sa San Pio Memorial Garden sa Clergy Compound sa Madang, siyudad sa Mati. Si Fr. Nelson, 57 anyos, taga San Isidro (Batobato),namatay sa sakit nga cancer sa pancreas sa iyang panimalay sa Mati City niadtong Marso 2, 9:30 PM, ug gilubong sa Marso 11. Subling gibenditahan ni Obispo Pat ang iyang lubnganan kon diin usab gibilin ang gidagkutan nga kandila, mga bulak ug usa ka dakong tarpaulin nga naghulagway sa iyang pagkapari.