Tagum diocese nakadawat sa mga ekipo sa kalamidad

Gipanalanginan ni Bishop Wilfredo Manlapaz sa Tagum ang mga ekipo nga gamiton sa pagresponde sa mga kalamidad niadtong Pebrero 21. (John Frances C. Fuentes)

TAGUM CITY—Isip usa sa mga lugar nga naigo sa Bagyong Pablo, ang Dyosesis sa Tagum nakakita og pamaagi aron makaresponde sa mga panginahanglan sa katawhan panahon sa mga kalamidad.

Pinaagi sa Caritas Manila, ang Dyosesis sa Tagum nakadawat og cargo truck, speed boat, mga sakyanan, life vests, ug uban pa.

Niadtong Pebrero 21, gipanalanginan ni Bp. Wilfredo Manlapaz ang mga ekipo sa wala pa gisugdan ang Misa sa Christ the King Cathedral sa Tagum diin gipahigayon ang kasaulogan sa 40th anniversary sa Alay Kapwa ug paglunsad sa Year of the Poor.

Gitambongan ang maong panghitabo sa mga social action directors ug mga workers sa nagkalain-laing dyosesis sa Mindanao. Gihimo ang panagtapok sukad Pebrero 19 hangtud 21.

Sumala sa Social Action Director sa Tagum nga si Fr. Emerson Luego, ang maong mga ekipo gamiton alang sa mga panginahanglan sa mga silingang diyosesis sa Mindanao ug pati na usab sa Visayas panahon sa pagresponde sa mga katalagman.

Dugang usab niya nga ang cargo truck mamahimo nilang mobile office kung asa sila magtrabaho samtang nagresponde sa mga katawhan.