Oratio Imperata

Karong Dominggoha Marso 1, magsugod ang ORATIO IMPERATA, pinasikad sa pagdapit ni Arsobispo Socrates Villegas, Presidente sa CBCP, nga ang tibuok Simbahang Katoliko sa Pilipinas, maghiusa sa pag-ampo alang sa KALINAW, dinhi sa atong nasud ug sa tibuok kalibutan. Ania ang bahin sa iyang sulat niadtong Pebrero 23, 2015:

The situation of the country and the world right now calls on all of us to turn to the Lord in humble supplication and gather our people to pray. As the nation continues to grieve over the tragedy in Mamasapano and the family of nations is threatened by war and terror from extremist groups, our best contribution to the nation and to the world is to encourage people to pray.

If my people, who are called by my name, will humble themselves and pray and seek my face and turn from their wicked ways, then will I hear from heaven and will forgive their sin and will heal their land. (2 Chronicles 7:14).

Uyon gayud ako niining panawagan. Busa, angayan ug takus gayud nga maghiusa kita sa pag-mobilisar sa kahiusahan sa mga santos sa langit ug yuta sa pagbatok sa mga dautan nga mga tinguha. Ania ang hubad sa Cebuano sa gisugyot nga pagampo sa CBCP:

Oratio Imperata for Peace
O Ginoo sa Kalinaw,
nagadangop kami kanimo sa among panginahanglan.
Tabangii kami nga magmatngon
Sa dakong pwersa sa kapintas ug terrorismo
Nga nagahulga sa among kalibutan karon.

Itugot kanamo nga magma-aghop
Sa pagpukaw sa pwersa sa kaayo, sa hustisya
Sa gugma ug sa kalinaw diha sa among mga katilingban.

Kung asa adunay panagaway, idupa nato ang atong mga bukton
Ngadto sa atong mga kaigsoonan.

Kung asa adunay ka-abundansya ug pagpasulabi
Anaa unta’y kasimpli sa pamuyo ug pag-inambitay sa usag-usa.

Kung asa adunay kawad-on ug kaalaot
Anaa unta’y pagkinabuhi nga matarong
ug makanunayong paningkamot
alang sa makatarunganong mga struktura

Kung asa adunay kahakog, anaa unta’y mapaubsanong pagpangalagad
Kung asa adunay inhustisya, anaa unta’y mapailubong pagtubos
Kung asa adunay mga samad sa pagkabahinbahin,
anaa unta’y panaghiusa ug pagkabuo.
Kung asa adunay pagpamakak ug panglimbong,
ang imong Kamatuoran maglingkawas unta namong tanan.
Kung asa adunay mga hunahuna sa pagpanimalos,
anaa untay paghilom ug pagpasaylo.

Tabangi kami nga maninguha alang sa Ebanghelyo sa kalinaw
Bisan sa among panaglahi sa tinuohan ug kaliwat.

Tudloi kami sa imong Spirito sa kalooy ug duyogkasakit.
Kay anaa lamang sa mahigugmaong pagsunod kanimo,
O Ginoo sa kalinaw,
Nga makaplagan namo ang makahilom nga tuburan sa kinabuhi
Nga magpadangat sa kabag-ohan sa among yuta
Usa ka bag-ong panahon sa kalinaw
Ug usa ka bag-ong kahusay tali kanamong tanan
Hangtud sa kahagturan. Amen.