Kalooy ug Duyog kasakit uban sa mga Kabus – Simbahan sa mga kabus

Human sa pagsud-ong sa nawong ni Kristo sa krus ug sa pagsabot sa pagpakakabus ni Kristo, mas masabtan na tingali nato gamay ang kahulugan ug katarungan sa atong ginatawag nga Simbahan sa mga Kabus.

Ang Simbahan isip lawas ni Kristo – mga sakop ug tugdumala, angayan lamang nga magpakakabus usab sumala sa Iyang dalan kamatuoran ug kinabuhi. Kaming mga Pari, kamong mga Relihiyoso, ug kamong mga laykong magtoo kinahanglan magpakakabus. Ug ang mga pamaagi ug struktura nga gamiton maglarawan usab sa maong kakabus sa Ebanghelyo. Kining hulagway sa Simbahan tingali ang makapatandog ug makapaabli sa mga tawo ngadto sa Dios ug sa Simbahan. Matud pa sa pahinumdum sa atong Santo Papa Francisco, kon wala kining pagkakabus, wala nato masabti ug mapuy-i sa tinuod ang Ebanghelyo ni Kristo. Mao kini ang tawag ug pagdapit sa Ebanghelyo.

Sa atong pagpaubos ug pagkakabus lamang kita mahimong mas magmatinagdanon ug maluwasnon sa tanang matang sa kakabus nga naggapos sa tawo sa kaulipnan sa sala ug bisyo, nga ngadto-ngadto nagdala kanila sa dili pagpanumbaling sa Dios o sa pagsalikway Kaniya ug sa Simbahan.

Ang Simbahan Katoliko dinhi sa Pilipinas dugay napud naninguha nga mahatagan ug katumanan ang maong Misyon sa Simbahan uban sa mga kabus sa atong kapanahonan. Sukad pa niadtong pagtapos sa Ika-2 Konsilyo Plenaryo sa Pilinas (PCP II), sa tuig 1991, gipahingusgan na pag-ayo kini sa lainlain nga diyosesis sa Pilipinas.

Dinhi sa Mindanao dinasig sa Mindanao Sulu Pastoral Conference sugod na sa dekada setenta, gitagaan na kini og dakong pagtagad pinaagi sa pagtukod ug pagpalambo sa mga Gagmayng Kristohanong Katilingban, ug lain pang susamang paningkamot. Nagapadayon pa kita sa pagpaningkamot sa pagtuman sa maong Misyon. Nagapadayon ang pagumol sa mga sumusunod ni Kristo, ang pagkinabuhi sumala sa iyang dagway ug kasamahan, ilabi na ang panaghiusa bunga sa kalooy ug duyogkasakit.

Nagapadayon ang paglikay ug paglaban sa tintasyon sa pagkatulog ug pagkaluya. Taliwala sa daghang hagit ug hulga gikan sa sulod ug sa gawas, dili lisod ang matintal nga magpabilin sa karaan ug naandan. Sugod kang San Juan Pablo II, gisunod ni Papa Benedikto XVI, ug hangtod kang Papa Francisco, gipalanog nila ang “Duc in Altum” sa ato pa, palawod kamo (Luk 5:4). Si Papa Francisco miingon diha sa iyang mensahe alang sa Kwaresma 2015 ginamit ang Santiago 5:8: “pabilin kamong lig-on diha sa paglaom”.