Ika-32 nga kapistahan sa San Pablo Parish gisaulog

Gisaulog sa parokya sa San Pablo ang ilang ika-32 nga kapistahan, Pebrero 22.

Kahinumdoman nga kini ang unang higayon nga gisaulog sa San Pablo Parish ang ilang parokya sa bulan sa Pebrero.

Si Archbishop Romulo G. Valles ang nangulo sa Santos nga Misa kauban si Bishop George Rimando, parish priest ug mga kaubanang pari.

Sa iyang homiliya giingon ni Abp. Valles nga si San Pablo usa ka kanhing beast kon halimaw nga maoy mipatay sa mga Kristiyano kaniadto una siya nahimong magsasangyaw.

“St. Paul was a beast before he was converted like an angel. Are we an angel or are we beasts to others?” sumala ni Abp. Valles.

“We are destined for the Kingdom of God if we allow the Lord to convert us to become angels,” dugang ni Abp. Valles.

BAG-ONG PROYEKTO SA PAROKYA

Sugod sa anticipated mass niadtong Pebrero 21, gisugdan ang pagpanalangin sa proyekto sa parokya nga ceiling fans nga gi-instalar karong bulana.

Sa misa nga gipangulohan ni Bishop George Rimando, gipanalanginan niya ang tulo ka ceiling fans nga napalit pinaagi sa fund-raising project sa parokya.

Sa Misa ni Abp. Valles, gihimo usab ang symbolic blessing sa maong ceiling fans una gisugdan ang Misa.

Gitaud ang maong mga ceiling fans aron mahimong mas komportable ang pag-apil sa mga katawhan sa kasaulogan sa Misa.