DAVRAA starts with Holy Mass (Mati News Bits)

Davraa starts with Holy Mass—Nagsugod ang dakong paduwa sa Davao Regional Athletic Association (DAVRAA) nga gi-host sa siyudad sa Mati karong tuiga Pebrero 24-28, 2015, pinaagi sa kasaulogan sa Santos nga Misa sa San Nicolas de Tolentino Cathedral, alas 7:00 sa buntag, pinangunahan ni Apostolic Administrator Fr. Edito “Ed” S. Baño.  Misunod ang press conference nga gisalmutan usab sa Catholic Media Network (CMN) Mati pinaagi sa mga sibyahanan sa radyo (DXHM-AM ug DXDV-Spirit FM) ug telebisyon (TCTV). Sr. Fr. Ed usab ang nagbungat sa Ecumenical Prayer sa opisyal nga pagbukas sa mga paduwa alas 3:00 sa hapon sa Mati Centennial Sports Complex atubangan sa liboan nga mga atleta ug nagkadaiyang mga opisyal ug representante gikan sa mga siyudad sa Davao, Tagum Panabo, Digos, Samal, ug Mati, ug mga probinsiya sa Davao del Sur, Davao del Norte, Compostella Valley, ug Davao Oriental. Nag-una sa mga nagsugat sa mga bisita sila si Mati City Mayor Carlo P. Rabat ug Governor Corazon N. Malanyaon, inubanan sa ubang mga opisyales sa panggamhanang lokal, probinsiyal ug rehiyonal, sa akademya ug DepEd, ug sa simbahan. Si Davao City Mayor Rodrigo R. Duterte maoy guest speaker sa okasyon. Nahimong garbo usab ang pagpasiga sa DAVRAA torch ni Sonny Boy “Bayogyog” Aporbo, ang bag-ohay lang nga kampeon sa 6th Penang Int’l Skimboarding Competition sa Malaysia inubanan sa mga batang gold medalist/kampeon sa Sepak Takraw 2014 Palarong Pambansa. Sa pag-awit usab sa mga Imno (hymns), ang “Mati” mao ang—matinabangon, matinagdanon, matinahuron, matinud-anon, matinumanon, ug matinuhuon. Taga Mati – Madayaw!
 
Pahibalo sa DBTC—Ang Don Bosco Training Center (DBTC) sa Dahican, Mati City magpahigayon og libreng Entrance Exam alang sa mga batan-ong lalaki ug ilabi na sa mga babaye nga nag-edad og diyesi-otso pataas (18 – above), high school graduate, vocational graduate o college level nga interesadong mo-enroll sa kursong usa ka tuig (1 year) Mechanical, Automotive, Integrated Farming ug Agricultural Mechanic Technology; tulo ka bulan (3 months) Welding Technology, ug lima ka bulan (5 months) Small Engine Repair and Maintenance. Ang Free Exam magsugod Marso 9 hangtud Marso 31, 2015, lunes hangtud sabado didto sa DBTC sa Dahican, duol sa PNP Barracks. Magdala lang og black or blue ballpen alang sa exam. Adunay 50% discount sa tuition fee alang sa mga babaye nga interesadong motuon sa mga kurso. Anaa usay mga dormitoryo sa DBTC compound nga mahimong mapuy-an og temporaryo sa mga bata. Alang sa dugang pangutana, mahimong motawag o mo-text sa 0910-2034-183.