8th Archdiocesan LCCP Convention Ipahigayon

Maghiusa ang 37 ka mga parokya sa lokal nga Simbahan sa Dabaw atol sa tinuig nga panagtigum nga gibansagang Archdiocesan Lectors, Commentators, Cantors & Psalmists (LCCP) Convention nga gipasiugdahan sa Archdiocese Liturgical Center sa Davao.

Kini ipahigayon karong Marso 7 aron sa pagpalapnag sa mensahe sa Ginoo base sa 2015 nga temang “Pagsangyaw sa maayong balita ngadto sa mga kabos”.

Ang maong kalihukan anaa na sa ilahang ika-walo na nga tuig sa pagsaulog nga mahitabo sa UIC Gym, Bajada ning dakbayan.

Puno kini sa mga aktibidades nga makapadasig pag-usab sa mga LCCP. Ang Santos nga Misa pangulohan ni Rev. Romulo G. Valles, D.D., arsobispo sa Dabaw.

Si Rev. Pare Ferdinand Lariosa, Spiritual Director sa St. Francis Xavier Regional Major Seminary mao ang pinasindunggang dinapit nga mamumulong. Daghan pang mga aktibidades nga makapadasig sa padayon nga pagsangyaw sa Pulong sa Dios ang giandam.

Ang maong kalihukan gilauman nga makapaabli sa kasing-kasing alang sa mga kabos nga matud pa sa 2 Corinto 8:9: Kay nasayod kamo sa grasya sa atong Ginoong Hesukristo. Bisan siya dato, nagpakakabos siya tungod kaninyo aron madato kamo pinaagi sa iyang kakabos. (Jam Mae Tarre)