Pugo Festival (Mati Newsbits)

Pugo festival—Talagsaong bahin sa kasaulogan sa kapistahan ni San Juan Bosco, pundador ug patron sa mga paring Salesiano ni Don Bosco (SDB) ang nasaksihan niadtong Enero 31, 2015, sa ilang pagtanyag og klase-klaseng pagkaon / kompetisyon nga hinimo sa unod ug itlog sa pugo sa panahon sa paniudto didto sa Don Bosco Training Center (DBTC) gym sa Dahican, Mati City, human sa kasaulogan sa Santos nga Misa nga gihalad sa mga paring Salesiano, pinangunahan sa ilang provincial superior Fr. George Militante, SDB, ang homilist, ug Bishop Patricio Alo, presider. Si Fr. Rex Carbilledo, DBTC director, maoy naghatag sa idiya sa iyang mga tinun-an, kinsa mi-pormag  unom ka grupo nga maoy nagmugnag orihinal nga mga putahe sa pagkaon sa pugo—sinabawan, adobo, pinirito, ginisa, sweet-sour, kare-kare, tortilla, ubp. Una nangaon ang tanan, gitan-aw, gitilaw ug gipili sa hurado ang mga mananaog sa “pugo festival.” Matud pa ni Fr. Rex, nga abre usab sila niadtong gusto mopalit o mopaluto og putahe sa pugo o sa itlog niini. Nasayran nga dali modaghan o mosanay ang pugo ug gatusan na kini sa ilahang kulungan sa Don Bosco.  
 
Adlaw sa Consecrated Life—Gisaulog sa kamadrihan ug kapariang relihiyoso sa diyosesis sa Mati ang kalibutanong adlaw sa mga Consagradong Tawo niining tuig usab sa kinabuhing consagrada niadtong Pebrero 1, Domingo, alas 2-5:30pm sa Immaculate Heart of Mary Academy (IHMA), ug alas 6:00pm sa San Nicolas de Tolentino Cathedral. Sa IHMA gipahigayon ang registration, pagpaminaw sa pakigpulong kabahin sa Year of the Consecrated Life, ang pag-prisintar sa hamubong kasaysayan sa nagkadaiyang congregasyon, ang personal nga pagpaambit og kasinatian ug pasyon sa pagkinabuhi sa kasamtangang misyon o missionary obedience, ug ang paghisgot/-sugyot sa mga posibleng kalihokan nga mahimo sa Association of Religious in the Diocese of Mati (ARDM) sa pakig-alayon usab sa mga katuyoan sa diocese ning kasamtangang tuig sa mga kabus. Si Fr. Alfredo Briones sa Society of Divine Vocations (SDV) maoy nakigpulong kabahin sa sulat pastoral sa Sto. Papa para sa Year of the Consecrated Life. Ang mga 30 nga religious sisters mirepresentar sa mga 10 ka congregasyong relihiyosa sa diocese gikan sa East Coast ug Gulf Towns. Si Bishop Emeritus of Mati Patricio Alo, inubanan ni Apostolic Administrator Fr. Edito Baño ug sa mga nag-conselebrar nga kaparian, ang nangulo sa Sakripisyo sa Sagrada Eukaristiya, kon diin usab gilitok sa mga pari ug madre ang ilahang hiniusang “renewal of commitment to the consecrated life.”
 
Pawikan festival—Agig pagsumpay sa gisulat ning column sa miaging bulan sa Enero, gidapit ang katawhan sa paglantaw sa mga nagadagsang ug nagapangitlog nga mga pawikan sa baybayon sa Dahican, sukad pa niadtong Disyembre 2, 2014 hangtud karon. Katapusang nakita sa nagabantay nga “Amihan sa Dahican” sa Plaza brother-volunteers ang Green Sea Turtles ug Olive Ridley Turtles niadtong Enero 25-27 nga nangitlog og kinatibuk-ang 263 ka itlog ug kung idugang sa miagi, 1,704 na ang mga itlog, samtang niadtong Enero 25-26 usab, gi-release ang 218 ka baby turtles nga nakit-ang hinay-hinay nang nag-prusisyon paingon sa dagat. Welcome, baby-pawiks! Matud pa ni Jun Plaza nga makita sab ang mga dolphin, dugong ug butanding.