Maryknoll Academy of Cateel garners regional awards

Maryknoll Academy of Cateel garners regional awards — “Bisan og gamay, pobre ug dili popular, na-bless gyud kami og dako sa pag-qualify alang sa National Championship.” Kini ang mga pulong ni Fr. Jay Ramos, principal sa Maryknoll Academy of Cateel (MAC), sa ilang pagdaog sa duha ka Regional 11 Journalism Awards nga gipartisipahan sa mga tulunghaan secondarya ug elementarya sa tibuok rehyon didto sa University of the Immaculate Conception (UIC), Bajada, Davao City, niadtong Pebrero 4-7. Morepresentar sa rehiyon ngadto sa 4th Taguig National Schools Press Conference ang managsuong Marquez—Nbroodz Gio Marquez (Grade 6) ug Nbroodz Vinci Marquez (Grade 7), mga kampeon sa Headline Writing and Copy Reading. Kahinumduman sab nga ang MAC maoy champion sa fancy drill sa provincial Boy Scouts Jamboree niadtong Nobyembre 2014. Dugang pa sa ilang pasidungog, matud ni Fr. Jay, mao ang qualification for entrance sa duha ka graduating high school students sa University of the Philippines (UP) nga nakapasar gikan sa 87,000 nga mikuha sa eksaminasyon kun diin usab 4,000 lang ang nakapasar.

Panawagan: dili pahimuslan ang IP sa pagpangwarta — Hugot ang panawagan karon sa apostolado sa mga lumad (IP) ug sa probinsiya sa Davao Oriental nga dili magpadala sa modus sa pipila ka mga tawo nga gigamit ang mga lumad aron makapangwarta. Gipasabot pa ni Bro. Bibiano Ongcay, diocesan IP coordinator, ug ni NCIP (National Commission on Indigenous Peoples) Chief Julius Mabini nga ang naasoy nga grupo ang mo-adto sa komunidad sa mga lumad, ug mangayo og kwarta bugti sa posisyon nga ilahang makuptan diha sa kahugpungan sa mga lumad. Nagamugna, matud pa, ang grupo og posisyon sa Congreso, Governor, ug Vice-Governor aron mahaylo ang mga lumad. Gipahayag usab ni DILG Provincial Director Yvette Tolentino-Sunga nga nakatakda siya nga magpagawas og “disclaimer” alang sa maong kalihokan. Nasayran nga naka-penetrate na ang grupo sa lungsod sa Banaybanay ug sa siyudad sa Mati.