Holy Name Society 29th Founding Anniversary (Mati News Bits)

HOLY NAME SOCIETY 29TH FOUNDING ANNIVERSARY — Ang pundok sa Holy Name Society sakop sa San Nicolas de Tolentino Parish, Diocese of Mati, mapasalamatong nagsaulog sa ilang ika-29 nga anibersaryo niadtong Enero 18, 2015 sa St. Therese Gym, Clergy House Compound, Mati City uban sa tema: ANG PAGKAB-OT SA KADAUGAN MAO ANG PAGLAWIG SA KAUGALINGON DIHA SA PAGPAKIGHIUSA SA KAKABUS. Samtang gihimo usab nga inspirasyon ang pagduaw ug mga mensahe ni Papa Francisco, labi na ang pagka-maluluy-on ug mapuanguron sa mga kabus ug nanginahanglan—Mercy and Compassion—atol sa iyang pagduaw sa nasud, Enero 15-19, 2015. Sa maong tinuig nga kasaulogan gipahigayon ang pagpili sa mga bag-ong opisyales alang sa tuig 2015. Busa ang kanhing Presidente sa Holy Name Society, Bro. Cupertino “Joy” Obguia gipasa ang Key of Responsibilities ngadto kang Bro. Reynaldo Albacite ang bag-ong Presidente uban nila Bro. Jose Ignacio ang 1st Vice President, Sis Annabelle Ortega 2nd Vice President, Sis Ritchel Zaspa Secretary, Sis Monique Matangcas Asst. Secretary, ug Bro Kon  Soto ug Sis Lourdes “Minda” Galon isip mga Treasurers sa maong pundok. Ang mga bag-ong opisyales nanumpa sa ilang buluhaton ug responsibilidad atubangan ni Rev. Fr. Randy Diamante, SDV, isip inducting officer diin siya usab mihatag sa iyang inspirational message alang sa tanang miembro. Si Fr. Randy ang mirepresentar usab sa mga kadagkoan ug ubang kaparian nga wala makatambong tungod sa ilang pag-adto sa Manila ug Tacloban alang sa papal visit.  
 
Human sa simpleng salu-salo mipasundayag ang ubang miembro sa ilang talento sa pagsayaw ug pag-awit agi’g pasalamat  sa Labing Gamhanan sa Iyang makanunayong pag-uban kanila sa pagpadayon sa pagpangalagad, lakip ang pagsuporta sa ubang apostolado sa diyosesis, sama sa Media (DXHM ug DCHerald) ug Bible Apostolate. (uban nila Sis Annabelle ug Minda)
 
EDUKASYON ALANG SA MGA FR’s — Gikalipay sa DXHM Media Outreach ug sa Mati DepEd ang pagbalik-eskuyla sa mga kanhi rebelde kon Former Rebels (FRs) nga anaa karon sa “Happy Home” nga nahimutang sa Sitio Magay, Brgy. Don Martin Marundan, Mati City.  Napulo kanila ang mikuha og examination niadtong Pebrero 1, 2015 gikan sa Alternative Learning System (ALS) aron makatikang pa og laing ang-ang sa edukasyon ug makahimo na usab sa pagpadayon sa ilang pagtungha kon diin ipatuman ang “acceleration” aron mapadali ang pagkab-ot nila sa gitinguha nga alternatibong edukasyon.  Matud pa ni Mrs. Evelyn Vallar, ang Happy Home manager, ang mga FR na mismo ang nagpahayag sa ilang kagustuhan nga makapadayon o makabaton og edukasyon. Gi-facilitate sa ALS ang exam nga gipahigayon sa Mati Nat’l Comprehensive High School (MNCHS). Si City of Mati Schools Division Supt. Reynaldo Guillena ang usa sa mga naghatag kanila og lecture, partikular na sa Mathematics. Human sa ilang exam, ang mga FR’s  ang nangandam na usab sa laing hugna sa skills training sa mosunod nga mga semana. (uban ni Ms. Neela Duallo)