Bag-ong padre kura sa Assumption parish gi-instalar

Gi-instalar ni Archbishop Romulo G. Valles ang bag-ong kura paroko sa Our Lady of the Assumption Parish, F. Torres St., nga si Fr. Hermogenes Garcia, SSS niadtong Enero 26.

Si Fr. Garcia ang mipuli sa kanhing kura paroko nga si Fr. Felix Elverio, SSS nga karon na-assign sa kaulohan.

Sa gipahigayong installation rites, gihimo ni Fr. Garcia ang pagbag-o sa iyang panaad panahon sa iyang ordinasyon nga magpabiling masulondon sa Obispo. Gidala usab siya sa Tabernakulo, nga simbolo sa iyang katungdanan isip kura paroko nga magsaulog sa mga sakramento.

Gipamatud-an usab sa kura paroko sa silingan nga parokya sa St. Jude Thaddeus Parish nga si Fr. Pedro Lamata ang certificate of installation.

Sa iyang pulong pasalamat, gisaysay ni Fr. Garcia nga dili bag-o sa iya nga ma-assign sa Assumption Parish. Giingon niya nga gi-andam na siya ni Fr. Elverio nga mahimong kura paroko panahon sa iyang pagka-assign isip parochial vicar sa maong parokya niadtong 2011.

Gikalipay usab ni Abp. Valles nga gihimo ang installation samtang bag-o pa lang nibisita si Pope Francis sa Pilipinas ug gipasidunggan usab niya ang mga kaparian sa Assumption Parish tungod sa ilang aktibong partisipasyon sa mga programa ug kalihukan sa Archdiocese of Davao. (@johnfrancesf)