Alay Kapwa

Sa miaging bulan, saksi ug miduyog kita sa pagduaw ni Santo Papa Francisco kanus-a nakauban nato siya sulod sa lima ka makasaysayan ug makasantos nga mga adlaw niadtong Enero 15-19. Ang tema sa iyang pagbisita nga Kalooy ug Duyogkasakit, nahimo gayud nga kasinatian sa diha sa atong mga pag-ampo, pagtinabangay, pagsakripisyo, ug panaghiusa uban kaniya, ug labaw sa tanan sa iyang kaugalingong pagsaksi niini sa iayng mga pulong ug buhat.

Karong Dominggoha Pebrero 22, 2015 maoy unang Dominggo sa Kwaresma ug pagsugod usab sa ika-40 sa ALAY KAPWA, nga hiniusang lihok sa Simbahang Katoliko dinhi sa Pilipinas.

Karon akong sugdan ang two part series nga pamalandong niining mabulukong panahon sa Kwaresma sa Tuig sa mga Kabus.

Kalooy ug Duyogkasakit uban sa mga Kabus – Part 1

Nahuman na ang Tuig sa Pagtoo (2013), Tuig sa Layko (2014). Karong tuiga, nagapadayon ang pagpalawom sa pagtoo, pinaagi sa Tuig sa mga Kabus. Sa kinatibuk-an, ang katuyuan nato niining tuiga mao ang dugang pang pagpasabot sa kahulugan ug kalambigitan sa kakabus sa kinabuhi sa pagtoo diha sa Simbahan, pinaagi sa Simbahan ug kauban sa Simbahan.

Unsa diay ang kahulugan niini? Kamong mga dato, apil ba mo niini? Nganong saulogon man nato ang kakabus? Alang sa makahuluganon ug mabungahong pagsaulog, angayan lamang nga sabton nato pagayo, pamalandongan ug, labaw sa tanan, puy- an kini nato.

Sud-onga si Jesus nga kabus

Si Jesus mismo ang nagpadayag sa misteryo sa bili sa mga kabus. Siya ang sukaranan ug sinugdanan sa kakabus nga atong ginasaulog karon. Gipadayag niya nga ang hunahuna sa tawo dili sama sa hunahuna sa Dios. Ang paagi sa tawo dili sama sa paagi sa Dios. Sa iyang pagpaubos ug pagpakabus gipadayag niya ang lahi nga pamaagi sa Dios nga lahi gayud kaayo sa pamaagi sa tawo.

Sa atong pagila kang Jesu Kristo, nasayran nato nga bisan siya Dios nagpakatawo siya gikan sa usa ka babaye ug natawo sa pasungan, sa gamay nga lungsod sa Betlehem. Nagpuyo siya, sa dugay nga panahon, sa gamay nga lungsod sa Nasaret ug nagpuyo sa yanong simpleng paagi, nagbuhat sa mga inadlaw-adlaw nga buluhaton, uban sa iyang mga ginikanan si Maria ug si Jose.

Sa hamtong na siya, sa panahon sa iyang pagtuman sa iyang misyon sa pagsangyaw sa Maayong Balita ug pagbuhat og maayo ngadto sa mga tawo, makita nato Siya nga kanunay nagtagad ug nagpalabi sa mga kabus sama sa mga gigutom, mga sinalikway nga mga sanlahon, ug mga gitamay ug gikasilagan nga makasasala sama sa babayeng nanapaw.

Ang iyang gitawag ug gipili nga unang mga tinun-an mga yanong mga mananagat sama ni Simon ug Andres, si Santiago ug Juan. Bisan mga makasasala iyang gitawag ug gipili, sama ni Mateo. Bisan og gitinguha sa pipila nga himoon siyang hari, milikay siya ug midumili.

Labaw sa tanan, sud-ongon nato si Jesus, diha sa mga katapusang adlaw niya, kanus-a siya gisakit, gidagmalan, gisalikway, gipakasad-an, ug sa katapusan, gipatay sa Krus. Sudongon nato ang iyang nawong samtang nagbitay sa Krus. Sud- ongon nato ang iyang mga mata – puno sa kalooy ug duyogkasakit sa tanang mga gagmayng tawo nga gibugatan ug nagantos sa ilang mga kasakit. Alang niini, makatabang ang makanunayong pamalandong sa mga Stasyon sa Krus karong panahona. (Paabota ang sunod nga bahin sa sunod semana)