63rd year sa Our Lady of Fatima Parish saulogon

Saulogon sa Our Lady of Fatima Parish sa Fatima Street, Davao City ang ika-63 nga tuig sa pagtukod sa maong parokya karong Pebrero 7.

Pinaagi sa Misa sa alas 6 sa buntag, saulogon sa tibuok parokya sa Fatima ang kasumaran sa pagtukod sa ilang parokya nga gisugdan sa mga misyonerong pari gikan sa Quebec, Canada nga nailhan nga mga PME Fathers.

Sumala ni Fr. Henry Campeon, kura paroko, malipayon sila nga magsaulog sa maong panghitabo isip usa ka parokya ug mapasalamaton siya sa mga nagdumala sa parokya sukad kaniadto.

Sa milabay’ng 63 ka tuig, usa sa mga pisikal nga kabag-ohan sa parokya mao ang sanctuary nga gipanindot aron mas makatabang sa mga tawo sa ilang disposisyon sa pagsaulog sa mga sakramento. Padayon usab ang mga programa sa parokya ilabi na sa pormasyon ug pagserbisyo sa isigkaingon. (@johnfrancesf)