Salamat sa Media Power (Mati News Bits)

Salamat sa Media Power – Hugot sab ang pagsubay sa katawhan sa Mati diocese sa lima-ka-adlaw nga record-setting visit ni Papa Francisco.  “Salamat gayud sa dakong gahum sa media sa pag-cover sa tibuok events sa papal visit alang sa katawhan, dili lamang sa Mati, o sa Pilipinas, kondili sa tibuok kalibutan,” asoy ni Fr. Enrique “Ikeng” Dongiapon, parochial vicar sa San Nicolas de Tolentino Cathedral, sa iyang wali sa katapusang adlaw o sa pagbiya na sa Sto. Papa niadtong Enero 19. Ang radio (DXHM-AM/DXDV-FM) ug cable television (TCTV) communication services usab sa Mati ang nagdalit og full coverage sa matag adlaw sa papal visit, kon diin nakita, nadungog ug nasinati ang mga makatandog nga mensahe ug mahigugmaong lihok ug mga panalangin sa Sto. Papa, ingon man ang reaksiyon sa kalipay ug pagpasalamat ug pagsakripisyo sa matahuron nga katawhan sa Diyos. Gidasig ug gipasalamatan usab ni Sr. Maita, OND, program directress, ang mga program hosts ug technicians sa ilang malahutayong kooperasyon nga naghatud og dakong kalumpusan sa kahanginan sa “Papal Visit – a Journey of Mercy and Compassion.”
 
Sto. Niño Fiesta sa Kinablangan – Gisaulog sa parokya sa Sto. Niño, Kinablangan, Baganga, Davao Oriental, ang ilahang ika-walo nga parochial fiesta sa ika-upat (inay ika-tulo) nga biyernes sa bulan, Enero 23, 2015, pinaagi sa pagpahigayon sa siyam ka mga Novena Masses matag alas 5:00AM ug ang Procession Enero 22 alas 3:00PM sinundan sa kasaulogan sa Eukaristiya, ug ang Fiesta Mass sa adlaw mismo, alas 9:00 sa buntag, nga gipangunahan nila Fr. Edito S. Baño, apostolic administrator ug Bishop Emeritus Patricio H. Alo, inubanan ni Fr. Roberto A. Ombon, parish priest, ug daghang kaparian gikan sa ubang mga parokya, labi na sa Contra Costa. Gipaningkamutan gayud nila Bishop Pat ug Fr. Ed nga maka-abot sa tukmang oras gikan sa ilang panagtigom sa Catholic Bishops Conference of the Philippines (CBCP) nga natapos sa kaudtohon sa Enero 22, 2015. Silang duha usab ang mihatod ug dugang kalamboan kabahin sa bag-o lang natapos nga makasaysayang papal visit 2015. Gipasabot usab ni Fr. Ombon nga  gisunod nila ang tema ning kasamtangang Year of the Poor and the Consecrated Life  nga “inspired by the visit of Pope Francis will challenge each Filipino to be a missionary of mercy and compassion, first to one’s family, then the community we serve…witnessing to the joy of the Gospel.” (Sr. Marietta Alo)