Mabulokong Bag-ong Tuig!

Pagkanindot nga pagsugod sa bag-ong tuig 2015 kay aduna kita’y dakong panalangin nga madawat. Moabotay na siya sa Enero 15 – si Santo Papa Francisco! Ambot kung gituyo ba ni niya o sa mga nagpahigayon sa iyang pagbisita. Apan maayo gayud nga pagka – “timing” – Piyesta sa Senor Santo Nino de Cebu! Ka dakong pagkatakdo sa makahuluganong Pangilin sa atong pagtoong Katoliko dinhi sa Pilipinas. Matud pa, ang mga manambong sa misa sa Enero 18 didto sa Luneta gidapit nga magdala sa ilang imahen sa Santo Nino kay magdungan kita og sayaw sa Sinulog. Pit Señor!

Alang kanako, dako kaayo nga grasya kining iyang pagduaw niining panahona, ilabi na luyo sa padayon nga dakong kabuang ug usik sa kinabuhi, tungod aduna lang gihapon mga tawo nga nalingaw sa pagpaboto nga walay hinungdan ug nakadaot sa daghan. Maayo na lang dinhi sa Dakbayan sa Dabaw, nagpakabana na ang kaggamhanan lokal. CONGRATULATIONS!

Labaw pa niini, ang mensahe nga iyang ipalanog, sa bisan unsang grupo iyang ikatagbo sa Manila man o sa Tacloban, sa nagkalainlain sector sa Simbahan ug sa sosyodad, nakaseguro ako nga magtabang kanatong tanan sa pag-angkon og gabayan sa pagpahiluna sa tagsatagsa kanato. Magasagubang kita sa lainlaing mga hulga polikal, ekonamiko, sa klima, ug sosyal, ang iyang mensahe motabang kanato aron madaog ug mabuntog nato ang spirito sa Yawa nga nagdala sa dakong kadautan sa atong Pamilya, katilingban, kagamhanan, ug sosyodad.

Kanunay gitagaan og kabug-aton ang tumong sa iyang pagbisita nga mao ang PASTORAL nga katuyuan. Pagbisita kini nga spiritohanon sa Magbalantay sa tibuok Simbahan Katoliko ngadto sa iyang mga anak ug ngadto sa tanang tawo nga maayo og kabubut-on. Nagadala siya sa mensahe sa Gugma, Kalooy nga mao lamang ang dalan ngadto sa Kalinaw sa Diyos.

Busa, nangandam na ba kamo sa pagabot sa Santo Papa? Gipatalinghugan ba ninyo ang mga pahimangno? Gihubad na ba ninyo sa inyong kaugalingon kinabuhi ang tema sa Iyang pagbisita – GUGMA UG KALOOY? Ilabi na sa mga semana sa Adbiyento ug Pasko sa Pagkatawo? Nangompisal na ba kamo ug nakig-uli sa Diyos nga inyong gisalikway pinaagi sa inyong mga sala? NIbalik na ba kamo sa pagsimba ug pag-apil sa Santos nga Misa? Mas matinagdanon ug matinabangon nab a kamo sa inyong isigkatawo bisan dili sila ingon nato?

Daghan kanato, natural dili makaadto didto mismo sa Manila ug Tacloban aron mahinagbo nato siya. APan mahimo gihapon nato kini pinaagi sa pagsubaybay sa Telebisyo sa mga Live coverage sa mga hitabo. Sa spiritohanong paagi makaapil lang gihapon kamo. Mas makataang kaninyo kon mosimba na kamo daan sa buntag og mokalawat na. Pagrosaryo kamo sa inyong mga panimalay og mga opisina samtang nagpaabot…. Sa inyong paglantaw sa TV ayaw mo’g tan-aw morag sine lamang. Hunahunaa nga nahiapil gayud kamo sa maong kasaulogan. Pag-ampo, paminaw, paglantaw og maayo, ug pagsimba gayud kamo.

Mag-ampo kita:

nga magmadasigon unta kita nga motagbo ug maminaw kang Santo Papa Francisco, Ginoo panalangini ang imong Simbahan. Amen.