Hope Through Media (Mati News Bits)

Hope through Media – Gipaskil ang mga tarpaulin ni Papa Francisco ug ang mensahe sa paglaum sa Catholic Media Network (CMN) sa mga simbahan sa diyosesis sa Mati, gikan sa Gulf Towns ngadto sa Contra Costa atol sa pagduaw sa Sto. Papa Enero 15-19, 2015. Kini gisugdan niadto pang bulan sa Disyembre ug gitiwas sa sinugdanan ning tuiga pag-abot sa dugang pang mga tarpaulina gikan sa kaulohan. “Be guardians of hope!” matud pa, “…the light of hope held out by the Gospel of God’s grace and mercy.”

Pagsaulog 2015 – Sa ikaupat na nga tuig, gilusad ang “Pagsaulog sa Ciudad sa Mati, Viva Señor Sto. Niño” sa Enero 18, adlawng domingo. Ang maong local version sa Sinulog Festival sa Sugbo ang gipasiugdahan sa siyudad sa Mati sa inisyatibo ni Ms. Joy Z. Almario sa pagpakig-abag sa Mati diocese pinangunahan ni Apostolic Administrator Fr. Edito S. Baño. Gikulminar ang nine-day novena pinaagi sa kasaulogan sa Fiesta Mass alas diyes sa buntag sa San Nicolas de Tolentino Cathedral ug pagbendita sa mga imahe sa Balaang Bata sa altar. Alas dos sa hapon gisugdan ang grand procession dungan sa pag-indak-indak sa kalsada ug “showcase of talents with images of Sto. Niño.”  Usa ka final community prayer and blessing of images ang mitak-op sa selebrasyon alas 5:30 pm. Aduna say mga souvenir items nga gipamaligya: mga rebulto, T-shirt, ug tarpaulins. Nasayran nga nakig-coordinate sab ang Dept. of Tourism sa pagpasiugda sa Pagsaulog 2015 alang sa mga gikinahanglang promotional materials, ug ingon man ang pipila ka mga tulunghaan nga mipartisipar sa talent showcase.
 
Yamang Dagat – Alang sa kasayuran sa tanan ug agig pagpasalamat sa “muy hermosa gracia del mar” (kadagatan) sa Kahitas-an, makita na karong panahona ang mga species sa pawikan, dugong, dolphin, ug butanding. Segun ni Jun Plaza sa Amihan sa Dahican, 12 ka mga pawikan (Olive Ridley) ang nangitlog og 1,441 eggs gikan Dec. 2, 2014 hangtud Enero 11, 2015. Nakita ang 7 ka dugong sa Dahican beach niadtong Enero 10 ug 11 ug posible sa sunod pang mga adlaw human ning pagmantala. Ang mating season sa Dugong: Enero – Abril; sa Dolphins: Enero hangtud Nobyembre; sa Butanding: Enero hangtud Agosto.