Ang Adbyento! (Part 2 of 2)

Kini nga lingin o circle of the wreath nagapahinom-dom kanato sa Dios mismo, sa iyang pagkawalay –sinugdanan (eternity) ug walay katapusang kalooy (endless mercy). Ang kolor nga berde o green diha sa lingin nagatimaan sa atong paglaum nga anaa diha sa Dios, paglaum sa pagbag-o, sa kausaban ug sa kinabuhing walay katapusan.

Ang Kandila naga-simbolo sa KAHAYAG GIKAN SA DIOS (Juan 1:4-9) sa pag-abot dinhi sa kalibutan pinaagi sa pagkatawo sa iyang pinalanggang Anak. Ang upat ka kandila naga-representa sa panahon sa pagpaabot sa upat ka Dominggo sa Adbyento, diin kini naga-simbolo usab sa upat ka siglo sa pagpaabot tali sa panahon ni Propeta Malaquias ug sa pagkatawo ni Kristo.

Ang kolor nga Purple sa kandila naga-kahulogan ug paghinolsol, paglaum, ug pag-abot sa manluluwas. Ang kolor nga Pink giandam sa ikatulo nga Dominggo sa adbyento. Gitawag usab kini sa Simbahan ug Gaudete Sunday nga nagakahulogan sa pagmaya ug paglipay (Filipos 4:4).

Gikinahanglan gayud ang tumang pagpamalandong sa kahibulongan ug walay puas nga kalooy nga gihatag sa Dios dinhi kanato kay usa ka dakong gasa alang kanato ang pagpakatawo sa atong Ginoo. Dili lang unta masentro ang atong atensyon sa mga dili kaayo mahinongdanon nga mga pagpangandam sama sa pag –shopping, sobrang pag-decorate, mga parties ug uban pang mga materyal lamang nga buluhaton. Kini ikaduha lamang sa atong hatagan ug pasiuna nga pagtagad kondili ang pinaka-una gayud sa tanan mao ang tinuod tang pamalandong sa gasa sa Dios kanato mao ang misteryo sa iyang pagpakatawo ug paghimo sa iyang kaugalingon nga sama kanato.

Tungod sa mga materyal/unodnon nga mga pagpangandam maoy hinungdanan nga ang atong komunidad nabalot na hinoon sa mga walay ayo nga pamatasan sa pagsaulog sa pagkatawo sa atong Ginoo. Nalimtan na ang sentro sa kasulogan mao ang atong Ginoong Jesukristo ug tungod niini ang mga tawo nga anaa sa kalisod makahuna-huna hinoon ug dautan kay sama sa among giingon ang PASKO karon nahimo na hinoon nga usa ka selebrasyon sa pagpanindotay ug gamit, padag-hanay ug regalo ug labaw sa tanan nahimo na kining komersyalismo.

Kini ka sayop nga pagsabot sa maong kasaulogan. Ang Pasko mao ang adlaw diin atong ipahari ang gugma sa Dios dinhi kanato ug pagka-manggihatagon nato sa uban sama sa gibuhat mismo sa Dios tungod sa iyang gugma kanato gihatag niya ang iyang bugtong Anak (Juan 3:16). Ang Pasko diin ang sentro niini si Ginoong Jesukristo dili ang kwarta ug uban pang materyal nga mga butang.