Templo sa Diyos

Ika-32 nga Domingo sa Tuig
Kapistahan sa Didikasyon sa Basilica sa Letran

Ang Liturhiya karong Dominggoha mao ang “Kapisthan sa Dedikasyon sa Basilica sa Letran” sa Roma. Mao kini ang Katedral ( seat and official residence) sa Santo Papa isip Obispo sa Roma. Ang maong Basilica gitawag ug giila nga “OMNIUM ECCLESIARUM URBIS et ORBIS MATER et CAPUT” kon MOTHER AND HEAD OF ALL CHURCHES IN ROME AND THE WORLD.

Isip Inahan nga simbahan, nagsimbolo kini og kahiusahan ug pagmatuto sa tanang sakop niini nga mao ang mga anak sa Diyos. Ang maong Kapistahan naghatod kanato sa pagpamalandong sa mas lawom nga kahulugan niining paghandom sa simbahan ang templo sa Diyos.

Sa Unang Pagbasa, si Propeta Ezekiel naghisgot mahitungod sa tubig nga nagdagayday gikan sa templo sa Diyos. Ang tubig nga naghatag og kinabuhi sa tanang binuhat. Diha usab sa templo sa simbahan kita gitigom ug gihiusa sa Diyos ug gipanalanginan sa nagdagayday nga grasya ug bendisyon nga maghatag kanato og bag-ong kinabuhi.

Si San Pablo sa iyang sulat ngadto sa taga Corinto, nagpahinumdom kanato nga kitang tawo mao ang buhing templo sa Diyos diin ang iyang spirit nagpuyo. Busa giawhag kita sa pagpabilin nga putling templo aron mamahimo kitang takos ug angayan sa pagpuyo kaniya sa atong kinabuhi.

Sa Ebanghelyo gikan kang San Juan, si Hesus sa mas dayag nga paagi gipakita kanato ang iyang kasibot alang sa Balay sa Diyos nga iyang Amahan diha sa iyang pag-abog niadtong mga tawo nga naghugaw-hugaw sa balay sa Diyos ug naghimo niining nga daw sama sa mercado/palengke.

Mga igsoon, sa atong pagsaulog niining kapistahan kita gihagit sa Diyos sa paghatag kaniya kung unsay angay kaniya: ang putli nga pagsimba ug pagrespeto sa simbahan ug pagpabilin nga balaan o sagrado niini isip TEMPLO SA DIYOS.