Salamat Bishop Patricio Alo

Bag-o pa lamang nasayran sa mga taga Daditama nga ang pagresign sa Obispo sa Mati, Msgr. Patricio Alo, gidawat na niadtong Octobre 19, 2014. Tungod sa iyang kahimtang sa panglawas ug pangidaron, niabot na ang takna nga si Bishop Pat, mopahulay gikan sa iyang pangatungdan isip unang Obispo sa Mati.

Nagsugod siya sa pagpangalagad isip Obispo didto sa Davao isip ika -3 nga Obispo Auxiliar ni kanhing Arsobispo Antonio Mabutas. Gitudlo siya nga Kura Paroko sa San Pedro Cathedral hangtod nga natudlo nga unang Obispo sa Mati. Sulod sa kapin nga 25 ka tuig nga iyang pagdumala sa Diyosesis sa Mati, milambo ang kinabuhi ug misyon sa maong simbahang lokal uban sa mga kaparian, mga relihiyoso ug mga laykong lideres sa Probinsya sa Davao Oriental.

Ang dayag kaayo nga kabilin ni Bishop Pat mao ang iyang paghatag og dakong bili sa paggamit sa “social communications media.” Ang Diyosesis sa Mati mao lamang ang dunay kusog ug malahutayon nga “social communications apostolate”, ginamit ang radyo ug TV, dinhi sa Daditama. Tungod niini ang tingog sa Simbahan kanunay nadungog sa mga balay sa mga lumulopyo.  Usa kini ka dakong hagit ug pagdapit sa ubang Diyosesis sa Daditama nga pahingusgan usab kini nila, ilabi na niining tawag sa panahon sa “New Evangelization.”

Busa daghan salamat Bishop Pat! Pagayo-ayo ug magkita-kita ra gihapon ta.

Mga patay apan buhi diha sa kalinaw ni Kristo

Niining mga adlaw sa Nobiyembre, atong gisaulog ang tinuig nga paghandum sa atong mga mahal sa kinabuhi nga milawig na sa laing kinabuhi. Isip mga Katoliko, giampo ug gidagkotan nato sila ug gipamisahan, ug kutob sa mahimo gipabenditahan usab ang ilang mga lubnganan. miduaw kita sa ilang mga lubnganan. Kining tanan pinadayag sa atong panaglambigit kanila bisan nga tua na sila sa laing kinabuhi.

Apan lakip usab niining mga adlaw ang paghinumdum usab sa ubang mga minatay, bisan gani kadtong lain og tinuohan sa Dios ug wala nagatoo sa kinabuhing dayon. Ang tanang mga kalag sa purgatoryo giapil nato, ilabi na intawon kadtong wala na mahinumdumi sa ilang mga kapamilya.

Lalom kaayo nga kahulugan ug kamatuoran ang nagpaluyo niining tinuig nga balansayon. Dinhi, gipadayag sa matag usa, bisan pa unsa ka mabaw o walay klaro, ang atong padayon nga panaglambigit sa mga mipanaw na. Gipadayon natong gihuptan ang pagtoo nga adunay kinabuhing dayon. Ang mga nangamatay buhi pa. Wala sila basta na lamang nahanaw. Kabalo kita nga anaa sila ug kita nga nagapaabot sa sunod natong panagtagbo. Ilabi na kitang mga Katoliko, nasulod kini sa atong ginapdayag nga pagtoo sa “panaghiusa sa mga santos, sa kapasasayloan sa mga sala, ug sa kinabuhing dayon.”

Labaw sa tanan, kini nagapadayag nga walay dili apil sa kalooy sa Ginoo. Walay gisalikway ang Ginoo sa iyang katuyuan ug kabubut-on nga luwason unta ang tanan. Maoy hinungdan nga makugihon kita nangamuyo alang sa kapasayloan sa ilang mga sala, sa katubsanan sa epekto sa ilang mga sala, ug ang nagalaum nga makab-ot ang katumanan sa kalinaw nga dayon.

Salamat gayud sa Dios, nga pinaagi sa pagpakamatay ug pagkabanhaw ni Hesu Kristo, ang pultahan sa langit, nga kaniadto nasarado tungod sa sala, naabli pagusab alang kanila nga modawat ug mosunod kang Kristo Hesus. Dalaygon gayud ang Diosnong Gugma ug Kalooy!