Pagpasalamat alang sa Laykong Pilipinhon

Magtapos karong Dominggo ang Tuig sa mga Layko. Ania ang pipila natong napupo sa milabay nga tuig basi sa litaniya sa pagdayeg ug pagpasalamat sa mga Layko:

“Dios among Amahan nagapasalamat kami kanimo tungod sa imong gasa sa Pilipinhong Laiko ngadto sa Simbahan.” Usa sa dakong bunga sa Ika-2 Konsilyo Batikano, MSPC, ug PCP II, mao ang pag-amgo ug paghigmata sa mga layko sa Simbahan sa ilang kaakuhan diha sa Simbahan, uban sa Simbahan ug pinaagi sa Simbahan. Niining milabay nga kapin 50 ka tuig maoy pag-usbaw sa mga laykong ministro ug missionero, mga gitawag nga “lay ecclesial movements” nga naghatag og bag-ong dagway ug kadasig sa Simbahan.

“Tungod sa pagkainahan ni Maria, una sa mga tinun-an, Inahan sa Pilipinas.” Gawas sa pagkainahan, ang Birheng Maria nahimo na usab siyang panig-ingnan ug gabayan sa pagkasumusunod ni Kristo. Nahimo siyang kasaligan nga kauban sa pagsangyaw sa Maayong Balita sa Kauwasan. Siya giila karon nga si Maria, Bitoon sa Bag-ong Pagsangyaw sa Ebanghelyo.

“Tungod sa pagkamakugihon sa mga batan-on, sa kalipay sa among kabata-an, ug sa inosensya sa among mga gagmayng bata.” Ila na sa mga batan-on ang panahon karon. Ang mga kabataan ug mga gagmayng bata ginaumol na karon ngadto sa mas mayo ug mahinungdanon ug makahuluganaong kaugmaon. Sila ang ginaandam alang sa umaabot. Ang Maayong Balita sa Kaluwasan unta may maghatag kanila niining nindot, sigurado, malipayon, ug malamboong kaugmaon, nga Dios lamang ang makahatag. Magmadawaton unta sila niining gasa sa Dios nga ipakita kanila ug ipadayag kanila sa mga misyonerng mga susmusunod ni Kristo.

“Tungod sa kalumo ug gugma nga imong gidala sa matag banay nga Pilipinhon.” Ang Kristohanong banay maoy pinakabililhong sabakan sa sibilisasyon sa gugma ug panaghiusa. Dinhi makat-onan sa matag tawo ang kaayo ug katarong ug tanan kaalam nga kinahanglan aron mabuhi nga manggianayon ug malinawon. Salamat nga gipakibililhon pa giapon nato ang PAMILYA. Apan magmabinantayon kita tungod kay daghan ang mga hulga ug hagit batok niini. Panalipdan unta nato pagayo ang Kristohanong banay.

“Tungod sa mga Laikong Pilipino nga nagtrabaho sa lagyo nga langyawng dapit.” Ginatawag sila nga mga “bayani” tungod sa dako nilang pagsakripisyo sa kaugalingon alang sa kaayuhan ug kabulahan sa ilang mga minahal sa kinabuhi. Ang ilang presenya sa laing mga nasud, dako ang natampo usab sa kaugmaran sa maong mga nasod. Ang ilang pagsaksi sa ilang pagkakatoliko nakapukaw sa mga galamhan sa mga lumulopyo didto ug nakadasig sa mga Simbahang local didto sa laing mga nasod. Apan, bantayan ang dakong kadaot usab nga nahiaguman sa mga miembro sa banay – ang bana ug kapikas, ang mga anak nga nagkabulag.

“Tungod sa mga nag-alagad sa katawhan, mga negosyante ug mga propesyonal nga nagtrabaho nga matinud-anon ug matahuron sa katungod sa tawo.” Daghan kaayo nga mga tawo kansang propesyon mao ang pagtag og serbisyo sa uban. Dalaygon sila sa ilang pagkamatinud-anon ug sulondon nga mga alagad publiko. Ang ilang pagtoo kang Kristo maglig-on unta kanila kanunay batok sa paghaylo ug pagdani sa mga lumalabay nga kabulahan. Magpabili unta sila nga mabination ug maalagaron sa tanan ilabi na ang mga nanginahanglan.

“Tungod sa mga mamumuo, mga magsasaka ug mangingisda nga nagdala ug dungog sa buhat sa tawo isip tigdunala sa kainaiyahan” Ang kinaiyahan dugay na natong ginadaot tungod sa mali nga paagi sa kaugmaran. Ang “Climate Change” mao ang bunga niini ug ang mga nangagi ug umaabot nga katalgman maoy nahiaguman nato tungod niini. Mas modaghan pa unta nga mga magsasaka, maguuma, mananagat ug mamumuo nga pagpakabana ug magtagad sa kinaiyahan aron ang nabilin pa mapanalipdan.

“Tungod sa mga masakiton ug mga tigulang, among mga igsuon nga dunay diperensya sa lawas ug mga higala nga gisakit, tungod sa paglaum ug kadasig nga ilang gitudlo kanamo pinaagi sa ilang kinabuhi.” Ang mga sinalikway ug giila nga walay pulos sa katilingban aduna gihapon kapuslanan ug bili. Nagatudlo sila kanato sa hiyas sa pagpaubos, pasensya, ug paglaom. Nagadasig sila kanato nga magmahigugmaon ug maloloy-on ngadto kanila ug sa uban sama nila. Luyo niining kasakit ug kalisdanan, anaa ang ilang paglaum nga ang Dios anaa ra sa ilang kiliran nga nagantos usab uban kanila. (jimmg48@gmail.com)