Pagpangandam panahon sa kalamidad gihatag’g pagtagad sa PSAM Assembly

“Ang tukmang panahon sa pagpangandam mao ang panahon nga wala pa ang katalagman.”

Kini ang giingon sa usa sa mga mamumulong sa gipahigayong PSAM General Assembly, Nobyembre 22, sa St. Francis Xavier Regional Major Seminary nga gitambongan sa 2,000 kapin nga mga Pangulo sa Alagad (PSA) gikan sa nagkalain-laing parokya sa Dabaw.
Sumala ni Prime Cruz nga taga-Immaculate Conception Parish, Mintal ug usa ka kanhing disaster relief operation worker, dako ang panginahanglan sa katawhan ilabi na diri sa syudad sa Dabaw nga mangandam tungod dako ang danyos nga mahiaguman sa syudad kung adunay mga kalamidad nga muabot.

Giingon niya nga linog ug tsunami ang adunay dakong danyos nga mahimo sa Dabaw tungod sa lokasyon niini.
Gipasabot usab niya sa mga PSA ang hinungdan sa mga weather-related risks mahitungod sa climate change ug global warming.
Giingnan usab niya nga angayan nga mas mangandam pa gayud kadtong mga komunidad nga nakasinati na og mga kalamidad sama niadtong baha sa Matina Pangi niadtong June 28, 2011. Dako ang posibilidad nga mahitabo ang sama niadtong klase nga higayon sa umaabot.

PSA ISIP SOCIAL ACTION VOLUNTEER

Sumala ni Fr. Leonardo Dublan, Jr., Director sa Archdiocesan Social Action Center (ASAC), ang katungdanan sa mga PSA dili lang hangtud sa pagpang-limpyo sa ilang kapilya kon dili ang PSA usa ka social action volunteer.

Dugang niya nga ang social action usa ka apostolado kon ministriya nga nangandoy nga adunay total human development isip pagpadayag sa pakig-hiusa sa katawhan sa ilang panginahanglan, pakig-hiusa sa mga kabus ug gidaug-daug, ug kini dili lang charity work apan pagpakaylap sa social justice ug integral development.

Mao usab kini ang mga programa nga gina-padagan sa PSAM: micro finance, HIV-AIDS/drugs/human rights abuses, poverty alleviation (works of mercy), relief and rehabilitation programs, ug disaster-preparedness program. (@johnfrancesf)